[A:628]ངོར་ཆེན་དཀོན་མཆོག་ལྷུན་གྲུབ་ཀྱིས་མཛད་པའི་ཡི་གེའི་སྟེང་ནས་ལེགས་པར་མནོས་ནས། སློབ་དཔོན་ཙནྡྲ་གོ་མིས་མཛད་པའི་སྡོམ་པ་ཉི་ཤུ་རྩ་འགྲེལ་དང༌། བླ་མ་ལྔ་བཅུ་པ་རྩ་འགྲེལ་གྱི་བཤད་ལུང་དཔོན་སློབ་ཀྱི་འབྲེལ་བརྟག་པའི་དོན་དུ་སྩལ། དེ་ནས་རྗེ་ངོར་ཆེན་དཀོན་མཆོག་ལྷུན་གྲུབ་ཀྱིས་མཛད་པའི་ཡི་གེ་ལྟར་སློབ་མ་རྗེས་སུ་གཟུང་བ་མཛད་དེ། བསགས་སྦྱོང་གི་ཁྲིད་དམིགས་རྣམས་ཕོག་ནས་སློབ་དཔོན་རང་ཉིད་བསྙེན་པ་ཁ་གསོ་བའི་ཏིང་ངེ་འཛིན་ལ་ཞག་བདུན་དུ་སྙོམས་པར་བཞུགས་ནས། ཏིང་ངེ་འཛིན་དེ་ལས་གྲོལ་བ་ན། བླ་མེད་རྡོ་རྗེ་ཐེག་པའི་ཐུན་མོང་མ་ཡིན་པའི་ཐབས་རྒྱུད་ཀྱི་གཙོ་བོ་སྨིན་གྲོལ་གཉིས་ལས། དང་པོ་ནི་ཀྱེ་རྡོ་རྗེ་ལྷ་དགུའི་རྡུལ་ཚོན་གྱི་དཀྱིལ་འཁོར་ཆེན་པོར་ངོར་ཆེན་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱིས་མཛད་པའི་ཀྱེ་རྡོ་རྗེའི་མངོན་པར་རྟོགས་པ་ཡན་ལག་དྲུག་པ་དང༌། གཏོར་ཆོག་མཛེས་པར་བྱེད་པའི་རྒྱན་དང༌། དབང་གི་ཆུ་བོ་ཆེན་པོ་མཛེས་པར་བྱེད་པའི་རྒྱན། དབང་གི་མཚམས་སྦྱོར་ལུང་དང་རིགས་པ་མན་ངག་གི་གཏེར་མཛོད་དང་རྒྱ་གཞུང་གི་བསྟོད་པ་དང་བཀྲ་ཤིས་རྣམས་ལ་བརྟེན་ནས། དབང་གི་མངོན་པར་རྟོགས་པ་བརྒྱད་དང་ལྡན་པའི་སྒོ་ནས་རྒྱུ་དུས་ཀྱི་དབང་གི་ཆུ་བོ་མ་ནུབ་པ་བཤད་པས་མཐའ་དཔྱད་དེ་སྦྱང་གཞི་སྦྱོང་བྱེད་ལེགས་པར་ངོ་སྤྲད་པ་དང་བཅས་ཏེ་སྨིན་རྒྱས་སུ་ནོས་པའི་ཐུན་མོང་གི་དབང་དྲུག་གི་སྐབས་ནས་བཅོམ་ལྡན་འདས་ཀྱི་རྩ་བའི་སྔགས་ཨཥྚའི་བཟླས་ལུང་བཅས་ཏེ་རྒྱུ་དུས་ཀྱི་དབང་ཕྱིན་ཅི་མ་ལོག་པ་ཐོབ་བོ། །དེ་ལྟར་ནོས་པའི་དམ་ཚིག་དང་སྡོམ་པ་རྣམས་མི་ཉམས་པར་བསྲུང་བ་གསལ་བར་སྟོན་པའི་རྡོ་རྗེ་ཐེག་པའི་རྩ་