[A:630]དཔྱད། ལུས་ཐབས་རྒྱུད་ལ་དབང་བཞི་དང་འབྲེལ་བའི་ལམ་གྱི་ཐོག་མར་བུམ་དབང་དང་འབྲེལ་བ་ཕྱི་བསྐྱེད་པའི་རིམ་པ་སེམས་འཛིན་དང་བཅས་པ་གསལ་སྣང་མ་མཐོང་བར་བསྒོམ་བློར་བྱས། དེ་དག་གི་སྐབས་སུ་རྡོ་རྗེ་འཆང་ཀུན་དགའ་བཟང་པོས་མཛད་པའི་ཀྱེ་རྡོར་སྒྲུབ་ཐབས་ཀྱི་རྒྱ་ཆེར་བཤད་པ་བསྐྱེད་རིམ་གནད་ཀྱི་ཟླ་ཟེར། ཀུན་མཁྱེན་བསོད་ནམས་སེང་གེ ས་མཛད་པའི་ཀྱེ་རྡོ་རྗེ་མན་ངག་ལུགས་ཀྱི་རྣམ་པར་བཤད་པ་དང་བསྙེན་པ་བྱ་ཚུལ་དང༌། བསྙེན་པའི་ཁ་སྐོང་གི་སྦྱིན་སྲེག་རྣམས་ཀྱིས་རང་གཞན་གྱི་དོན་གང་སྒྲུབ་ཀྱང་ཕྱིན་ཅི་མ་ལོག་པར་ཤེས་པའི་རྡོ་རྗེ་སློབ་དཔོན་དུ་བསྒྲུབས་ནས། ཕྱི་རོལ་དུ་ཞེན་པའི་གདོན་གྱི་གཉེན་པོར་ནང་རྡོ་རྗེ་སློབ་དཔོན་ཆེན་པོའི་དོན་དམ་ཟབ་མོ་ལུས་ཀྱི་དཀྱིལ་འཁོར་དུ་ཤར་ཆེན་བྱམས་པ་ཀུན་དགའ་བཀྲ་ཤིས་ཀྱིས་མཛད་པའི་ཡི་གེའི་སྟེང་ནས་ལམ་དུས་ཀྱི་དབང་གི་ཆུ་བོ་མ་ནུབ་པ་བསྐུར་བ་ཡི་གེ་བརྒྱ་པའི་བཟླས་ལུང་བཅས་པ་སྩལ་ནས། ཀུན་མཁྱེན་བསོད་ནམས་སེང་གེ ས་མཛད་པའི་ལུས་དཀྱིལ་གྱི་རྣམ་པར་བཤད་པ་བདེ་ཆེན་བཅུད་ཀྱི་སྙིང་པོ་དང༌། ཀྱེ་རྡོ་རྗེའི་མངོན་པར་རྟོགས་པ་ལམ་དུས་ཀྱི་དབང་དང་བཅས་པའི་རྣམ་པར་བཤད་པ་བཀླགས་པས་ཀུན་ཤེས་ཀྱི་ལུང་ཡང་སྩལ་ཞིང༌། དེ་ནས་ཁྲིད་གཞུང་ལྟར་ནང་བསྐྱེད་པའི་རིམ་པ་བསྒོམ་བྱའི་དོན་ལ་ཐོས་བསམ་གྱིས་སྒྲོ་འདོགས་དཔྱད་དེ་དཔྱད་དོན་ཉམས་སུ་ལེན་པ་བསྐྱེད་རིམ་སེམས་འཛིན་གྱི་ཉམས་ཁྲིད་ལ་ལམ་དང༌། ལྟ་བ་དང༌། གྲུབ་མཐའ་དང༌། འདའ་ཀ་མ་དང༌། ཞར་བྱུང་བར་དོ་དང༌། འབྲས་བུ་སྟེ་དོན་ཚན་དྲུག་ལྡན་དུ་སྩལ། གསང་དབང་གི་ལམ་བདག་བྱིན་གྱིས་བརླབས་པ་ཁམས་འདུས་པ་