[A:87]སྒྲ་ལན་གཉིས་སུ་བགྲངས་པའི་ལྔར་འདོད་པ་དང༌། སྟག་ཚང་ལོ་ཙཱ་བས། སྐར་རྩིས་སྙན་ངག་སྡེབ་སྦྱོར་དང༌། །མངོན་བརྗོད་ཟློས་གར་འདི་ལྔ་ལ། །རིག་གནས་ལྔ་ཞེས་འཕགས་ཡུལ་ན། །གྲགས་པའི་བ་དན་རླུང་ལྟར་སྒྲོག། ཅེས་སྒྲ་མི་བགྲངས་པར་དུས་འཁོར་གྱི་རྩིས་དང་དབྱངས་འཆར་གྱི་རྩིས་རིག་གཅིག་ཏུ་བགྲངས་པའི་ཆུང་བ་ལྔ་ཞེས་པའི་ཐ་སྙད་མཛད་མོད། དོན་ལ་འགལ་བར་མི་སེམས་ཏེ། ངེས་པར་ཆེ་ཆུང་གི་ཐ་སྙད་དེ་ལྟར་དགོས་པའི་གྲུབ་མཐའ་འཆའ་ན་གོང་གི་མདོ་སྡེ་རྒྱན་གྱི་ལུང་དེ་ལ་ཡང་མ་ཁྱབ་པའི་སྐྱོན་ཡོད་པར་ཐལ། དེར་སྡེབ་སྦྱོར་དང་སྙན་ངག་ལ་སོགས་པ་གཞན་ལྔ་པོ་རྒྱལ་བའི་སྲས་ཀྱིས་བསླབ་བྱར་མ་བསྟན་པའི་ཕྱིར་རོ། །དེས་ན་གང་ལྟར་ཡང༌། རྒྱ་གར་རྡོ་རྗེ་གདན་གྱི་མཁས་པ་སྒོ་དྲུག་ཏུ་གྲགས་པའི་ཡ་གྱལ་རྩོད་དུས་ཀྱི་ཐམས་ཅད་མཁྱེན་པ་ཆེན་པོ་རིན་ཆེན་འབྱུང་གནས་ཞི་བའི་ཞལ་སྔ་ནས་ཀྱིས་མཛད་པའི་སྡེབ་སྦྱོར་རིན་ཆེན་འབྱུང་གནས་ཀྱིས་བྲྀཏྟ་ཛཱ་ཏི་ངོ་མཚར་རྟོགས་བྱེད་ཀྱི་རི་མོ་དང་བཅས་པ་ལེགས་པར་ནོས་པའི་བརྒྱུད་པ་ནི། པཎྜི་ཏ་ཆེན་པོ་རིན་ཆེན་འབྱུང་གནས། པཎ་ཆེན་ས་དབང་བཟང་པོ། ཤོང་ལོ་ཙཱ་བ་མཆེད་གཉིས། ལོ་ཙཱ་བ་མཆོག་ལྡན་པ། དཔང་ལོ་ཆེན་པོ། ལོ་ཆེན་བྱང་ཆུབ་རྩེ་མོ། ལོ་ཆེན་ནམ་མཁའ་བཟང་པོ། སྐད་གཉིས་སྨྲ་བ་ཐུགས་རྗེ་དཔལ། དཔལ་སྡིངས་ལོ་ཆེན་གྲགས་པའི་མཚན་ཅན། འགོས་ལོ་ཙཱ་བ་གསུམ་པ་ཆོས་སྐྱོང་བཟང་པོ། སྐྱོགས་སྟོན་ཀརྨ་ལོ་ཙཱ་བ། དཔལ་ཁང་ལོ་ཙཱ་བ་དབྱངས་ཅན་སྙེམས་པའི་སྡེ། སྒང་ར་ལོ་ཙཱ་བ་འོད་ཟེར་རྒྱལ་མཚན། ཤེས་བྱ་ཀུན་རིག་སྨོན་