[A:176]ཕོ་མོའི་ཚུལ་དུ་བསྒྲུབ་པའི་རྟེན་དང་བཅས་པ་རྣམས་ཀྱི་ཞལ་ཤེས་ཐུན་མོང་མ་ཡིན་པ་རྡོ་རྗེ་འཆང་ཚར་པ་ཆོས་རྗེའི་གསུང་རྒྱུན་མདོ་ཁམས་པ་རྡོ་རྗེ་བཀྲ་ཤིས་ཀྱིས་ཟིན་བྲིས་སུ་བཀོད་པ་སྣོད་དང་ལྡན་ངེས་ལ་ཆིག་བརྒྱུད་མ། འདི་ལུང་རྒྱུན་ལྟ་ཅི་དཔེ་རྒྱུན་ཡང་དཀོན་ཞིང་འདི་ནས་རབ་གནས་ཞག་བདུན་མ་ཁོལ་དུ་ཕྱུང་སྟེ་ཟུར་དུ་བྲིས་པའི་ཡི་གེ་ཡང་མཐོང་ངོ༌། །ལྔ་པ་འཇམ་དབྱངས་མཁྱེན་བརྩེའི་དབང་ཕྱུག་གིས་མཛད་པ་ལ། དཔལ་རྡོ་རྗེ་ནག་པོ་ཆེན་པོའི་སྲུང་འཁོར་རྡོ་རྗེ་བྲག་རྫོང་མའི་སྙན་བརྒྱུད་ཐུན་མོང་མ་ཡིན་པའི་ཁྲིད་ཡིག་ས་སྐྱ་ཚད་ཀྱི་རྣ་བར་མ་གྲགས་པའི་སྙིང་ནང་གི་ཟུངས་ཁྲག་ལྟ་བུ་ལྕགས་བྱི་སྣྲོན་གྱི་ཟླ་བའི་ཉེར་ལྔ་ལ་ཚོང་འདུས་འདོད་དགུ་འབྱུང་བའི་ལྟེ་བ་རྒྱལ་པོའི་ཕོ་བྲང་ཆེན་པོའི་གཟིམས་ཆུང་ཆོས་རྒྱལ་ཕོ་བྲང་དུ་མཛད་པ། དེའི་སྦྱར་བྱང་དུ། རང་བཟོའི་འཇིགས་འཇིགས་བསྒྲིགས་པའི་རྡོ་ཕལ་མདོག། འབྲེལ་མེད་མགལ་དུམ་སྤེལ་བའི་རྙོག་མ་ཅན། །ཉམས་ལེན་འོད་དཀར་སྤྲོས་ཚེ་སྐལ་ལྡན་གྱི། །སྙིང་གི་པདྨོ་ཟུམ་དང་འདི་མི་འདྲ། །ཞེས་གསུངས་པ་རྡོ་རིང་ཀུན་རྒྱན་པ་སོགས་ཀྱིས་མན་ངག་མ་ཚང་བའི་རས་རུལ་བསྡུས་ནས་འཆད་པ་རྣམས་ལ་དགོངས་པ་འདྲའོ། །རྩ་གསུམ་འཁོར་ལོ་ལྔ་ལ་བརྟེན་ནས་སྒྲུབ་པ་ནང་སྒྲུབ་དང་གསང་བ་ཡང་གསང་སེམས་ཀྱི་གནད་ལ་བརྟེན་ནས་སྒྲུབ་པའི་གསང་ཁྲིད་ཡིད་བཞིན་ནོར་བུ། ཁྲིད་མ་ཐོབ་པར་ལུང་གི་གནང་བ་དཀྱུས་གཅིག་ཅིང་སྦྱར་བྱང་དུ། རྡོ་རྗེ་འཆང་ནས་རྩ་བའི་བླ་མའི་བར། །སྙན་བརྒྱུད་ཁོ་ནར་བྱོན་པའི་གསང་ཆེན་འདི། །སྙིང་དབུས་ཆོངས་ལ་ཉམས་ལེན་རྒྱུན་དུ་སྐྱོངས། །ཀུན་ལ་མ་སྤེལ་སྣོད་ལྡན་གཅིག་ལ་བྱིན། །ཞེས་པ་