[A:176]pho mo'i tshul du bsgrub pa'i rten dang bcas pa rnams kyi zhal shes thun mong ma yin pa rdo rje 'chang tshar pa chos rje'i gsung rgyun mdo khams pa rdo rje bkra shis kyis zin bris su bkod pa snod dang ldan nges la chig brgyud ma/ 'di lung rgyun lta ci dpe rgyun yang dkon zhing 'di nas rab gnas zhag bdun ma khol du phyung ste zur du bris pa'i yi ge yang mthong ngo / /lnga pa 'jam dbyangs mkhyen brtse'i dbang phyug gis mdzad pa la/ dpal rdo rje nag po chen po'i srung 'khor rdo rje brag rdzong ma'i snyan brgyud thun mong ma yin pa'i khrid yig sa skya tshad kyi rna bar ma grags pa'i snying nang gi zungs khrag lta bu lcags byi snron gyi zla ba'i nyer lnga la tshong 'dus 'dod dgu 'byung ba'i lte ba rgyal po'i pho brang chen po'i gzims chung chos rgyal pho brang du mdzad pa/ de'i sbyar byang du/ rang bzo'i 'jigs 'jigs bsgrigs pa'i rdo phal mdog/ 'brel med mgal dum spel ba'i rnyog ma can/ /nyams len 'od dkar spros tshe skal ldan gyi/ /snying gi padmo zum dang 'di mi 'dra/ /zhes gsungs pa rdo ring kun rgyan pa sogs kyis man ngag ma tshang ba'i ras rul bsdus nas 'chad pa rnams la dgongs pa 'dra'o/ /rtsa gsum 'khor lo lnga la brten nas sgrub pa nang sgrub dang gsang ba yang gsang sems kyi gnad la brten nas sgrub pa'i gsang khrid yid bzhin nor bu/ khrid ma thob par lung gi gnang ba dkyus gcig cing sbyar byang du/ rdo rje 'chang nas rtsa ba'i bla ma'i bar/ /snyan brgyud kho nar byon pa'i gsang chen 'di/ /snying dbus chongs la nyams len rgyun du skyongs/ /kun la ma spel snod ldan gcig la byin/ /zhes pa