[A:42]རྒྱུན། འདི་ནི་དུས་གཅིག་ལ་སྣོད་ལྡན་གྱི་སློབ་བུ་གཅིག་ལ་ཆིག་བརྒྱུད་མ་གཏོགས་མང་པོར་མི་སྤེལ་བའི་བཀའ་རྒྱ་དང་ཕྱག་ལེན་གྱི་རྒྱུན་མ་ཉམས་པ་ཡོད་ཅིང༌། དེའི་རྒྱུ་མཚན་ཡང་དཀར་ཆག་ཏུ། བློ་ཆུང་ཐུན་མོང་གདམས་པས་ཚིམ། །འབྱོར་ལྡན་ལུང་མེད་ཡིག་ཧྲུལ་སྡུད། །ཤེས་འདོད་གྲགས་པའི་རྗེས་སུ་འབྲང༌། །དེ་དག་ཆུ་འདོད་སྨིག་རྒྱུར་སྙེག། ཅེས་པའི་ངང་ཚུལ་དང་ཡེ་མི་འདྲ་བར་སློབ་དཔོན་ལྷན་སྐྱེས་རོལ་པ་ནས་བཟུང་སྟེ་རྗེ་བཙུན་ཀུན་སྤངས་ཆེན་པོའི་བར་དུ་ཚད་མ་བཞི་ལྡན་གྱི་སྙན་བརྒྱུད་གདམས་པའི་ངད་མ་ཡལ་བའི་ཟབ་གནད་དང་ལྡན་པས། ཇི་སྐད་དུ། ཁོ་བོས་དམ་པའི་ཞབས་པད་རིང་དུ་བསྟེན། །སྙན་བརྒྱུད་བདུད་རྩིའི་ཞལ་འོད་སྙིང་ལ་ཤར། །འཁྲུལ་མེད་གདམས་པའི་གནད་ལ་ངེས་པ་ཐོབ། །གྲོགས་དག་འདི་འདྲའི་སྐལ་བཟང་ཁོ་བོ་ཙམ། །ཞེས་གསུངས་པ་སྙིང་ལ་བཅང་བར་བྱའོ། །བདག་ཉིད་ནུས་ལྡན་དུ་བྱ་བ་དང་ལིངྒའི་སྙིང་གར་འཇུག་པའི་འཁོར་ལོའི་ཞལ་ཤེས་ཀྱི་ཡིག་ཆུང་བཀའ་རྒྱ་ཤིན་ཏུ་དམ་པ་རྣམས་སོ། །༈། །གཉིས་པ་ཀླུ་སྒྲུབ་ཀྱིས་མཛད་པའི་དངོས་གྲུབ་འབྱུང་བའི་སྐོར་ལ། བསྙེན་པ། ལྷ་དབང་དུ་བྱས་ནས་དོན་བསྒྲུབ་པ། ཀླུ་དབང་དུ་བྱས་ནས་ཆར་དབབ་ཅིང་ནོར་བསྒྲུབ་པ། གནོད་སྦྱིན་དབང་དུ་བྱས་ནས་ཟང་ཟིང་བསྒྲུབ་པ། མི་མ་ཡིན་དབང་དུ་བྱས་ཏེ་སྲོག་འཕྲོག་པ། རྨི་ལམ་ངན་པ་བཟློག་པ། ཤེས་རབ་འཕེལ་བ། སྲིའུ་གསོ་བ་རྣམས་སྟོན་པ་ཁམས་གསུམ་ལས་རྣམ་པར་རྒྱལ་བའི་སྒྲོལ་མའི་སྒྲུབ་ཐབས་སློབ་དཔོན་ཀླུ་སྒྲུབ་ཀྱིས་མཛད་པ་ཀོ་ས་ལར་འཁྲུངས་པའི་བཻ་རོ་ཙ་ནའི་རང་འགྱུར། དེའི་ལག་ལེན་གྱི་ཡིག་སྣ་ལ་ལོ་རྒྱུས། ཞི་