[A:123]pa'i yi ge don gnyer gdengs can rol pa'i chu gter las/ so sor thar pa'i sdom pa'i chos skor thos pa'i brgyud rim gyi sarga ste bzhi pa'o/ // /gnyis pa byang chub sems dpa'i sdom pa'i chos skor thos pa'i brgyud rim ni/ blo gros rgya mtshos zhus pa'i mdo las/ rdzogs pa'i byang chub sems dang chos 'dzin dang / /chos sgrub pa dang srog chags snying brtse ba/ /chos bzhi 'di dag yon tan mtha' med de/ /'di dag mtha' ni rgyal ba mi gsung ngo / /zhes dang / byang chub sems dpa'i spyod pa la 'jug pa las kyang / byang chub sems bskyed gyur na skad cig gis/ /'khor ba'i btson rar bsdams pa'i nyam thag rnams/ /bde gshegs rnams kyi sras zhes brjod bya zhing / /'jig rten lha mir bcas pas phyag byar 'gyur/ /zhes dang / bslab btus las/ sdug bsngal mthar 'byin 'dod pa dang / /bde ba'i mthar yang 'gro 'dod pas/ /dad pa'i rtsa ba brtan bya ste/ /byang chub la ni blo brtan bya/ /zhes gsungs pa ltar rang gzhan thams cad srid zhi'i pha rol du son pa'i mi gnas pa'i mya ngan las 'das pa don du gnyer ba'i blo gros can rnams kyis/ gnas skabs su lha mi'i go 'phang tsam mam rang don du zhi bde'i mya ngan las 'das pa lhur byed pa'i bsam sbyor thams cad las rgyang bsrings te/ rgyal ba'i myu gu rnams kyi 'jug sgo chen po 'dir 'jug pa la shin tu 'bad dgos te/ ci'i phyir na/ thub pa'i dgongs pa rab tu gsal ba las/ phan bde'i 'byung gnas rdzogs pa yi/ /sangs rgyas rgyal ba'i sras las 'khrungs/