[A:22]'byed do/ /de dag so so'i mtshan nyid dang dper brjod gnyis/ dang po ni/ kun rdzob bden pa brjod bya'i gtso bor byas nas ston pa de dang po'i dang / don dam bden pa brjod bya'i gtso bor byas nas ston pa de phyi ma'i ste/ blo gros mi zad par bstan pa las/ kun rdzob bsgrub pa ston pa ni drang ba'i don to/ /don dam bden pa ston pa ni nges pa'i don te zhes so/ /gsum pa rjod byed kyi sgo nas ni gsung rab yan lag bcu gnyis su 'gyur te/ brgyad stong 'grel chen snying po mchog las/ mdo sde dbyangs bsnyad lung bstan dang / /tshigs bcad ched brjod gleng gzhi dang / /rtogs brjod de lta bu byung dang / /skyes rabs shin tu rgyas pa dang / /rmad byung gtan la dbab pa'i sde/ /gsung rab yan lag bcu gnyis so/ /zhes gsungs pa ltar ro/ /bzhi pa gnyen po'i sgo nas ni/ 'dul ba'i sde snod/ mdo sde'i sde snod/ mngon pa'i sde snod de gsum du 'jog ste/ lhag pa tshul khrims kyi bslab pa brjod bya'i gtso bor ston pa'i gsung rab de dang po'i mtshan nyid/ lhag pa ting nge 'dzin gyi bslab pa brjod bya'i gtso bor ston pa de gnyis pa'i mtshan nyid/ lhag pa shes rab kyi bslab pa gtso bor ston pa de gsum pa'i mtshan nyid do/ /de gsum gyis ris su gsung rab yan lag bcu gnyis bsdu ba ni/ mdo'i sde dang dbyangs kyis bsnyad pa dang lung du bstan pa dang tshigs su bcad pa dang ched du brjod pa ste lnga ni nyan thos kyi mdo sde/ gleng gzhi dang / rtogs pa brjod pa dang / de lta bu byung ba gsum ni nyan thos kyi 'dul ba/ skyes rabs ni byang sems kyi 'dul ba/ shin tu rgyas pa dang