[A:23]rmad du byung ba'i sde gnyis ni byang sems kyi mdo sde/ gtan la dbab pa ni gnyi ga'i chos mngon pa'i sde snod du bsdu'o/ /gang gi tshe gsang sngags kyi sde snod ni sde snod gsum po gang du bsdu ba yin snyam na/ slob dpon shAnti pas ni/ zab mo'i don bsdus te ston pas mdo sde yin no zhes gsungs shing / slob dpon 'jigs med 'byung gnas sbas pas ni bslab pa gsum ga ston pas sde snod gsum ga'o zhes bzhed la/ slob dpon 'phags pa lhas ni rig pa 'dzin pa'i sde snod do zhes de nyid logs su phye ba'i bzhi par bzhed do/ /de ltar na sde snod bzhi pa nyid gdul bya thun mong ma yin pa'i don du gsungs pa'i phyir phyi ma nyid 'thad par gsung ngo / /lnga pa gdul bya'i sgo nas ni nyan thos kyi sde snod dang / byang chub sems dpa'i sde snod de gnyis su 'byed de/ de dag so so'i mtshan nyid dang / khyad par gnyis/ dang po ni/ theg pa chung ngu'i lam dang / 'bras bu'i rnam gzhag gtso bor ston pa'i gsung rab de dang po'i dang / theg pa chen po'i lam dang 'bras bu'i rnam gzhag gtso bor ston pa de gnyis pa'i'o/ /gnyis pa ni/ nyan thos kyi sde snod las byang sems kyi sde snod khyad par du gyur pa'i tshul mang du 'byung mod/ 'phags pa langkar gshegs pa las/ chos lnga dag gi rang bzhin gsum/ /rnam par shes pa brgyad nyid dang / /bdag med gnyis kyi dngos por ni/ /theg pa chen po mtha' dag 'dus/ /zhes gsungs te/ de'ang ming dang rgyu mtshan dang rnam par rtog pa dang de bzhin nyid dang yang dag pa'i mtha' ste chos lnga dang / kun brtags