[A:24]gzhan dbang yongs grub ste rang bzhin gsum dang / rnam par shes pa tshogs drug dang / nyon mongs pa can gyi yid dang kun gzhi'i rnam shes te brgyad dang / gang zag dang chos kyi bdag med gnyis te de dag ston pa ni theg pa chen po'i gzhung du bshad cing / lam dang 'bras bu'i khyad par bdun gyi sgo nas 'phags pa'i tshul ni/ mdo sde rgyan las/ dmigs pa che ba nyid dang ni/ /de bzhin sgrub pa gnyis dag dang / /ye shes brtson 'grus brtsams pa dang / /thabs la mkhas par gyur pa dang / /yang dag grub pa chen po dang / /sangs rgyas phrin las chen po ste/ /chen po 'di dag dang ldan pas/ /theg chen zhes ni nges par brjod/ /ces pa ste/ mdo sde la sogs pa'i chos rgya chen po la dmigs pa dang / rang dang gzhan gyi don gnyis sgrub pa dang / rtogs pa'i dus na bdag med gnyis rtogs pa dang / bskal pa grangs med gsum du sbyor ba'i brtson 'grus brtsams pa dang / 'khor bar mi gtong zhing kun nas nyon mongs pas gos pa med pas thabs la mkhas pa dang / stobs la sogs pa sangs rgyas kyi chos ma 'dres par yang dag par grub pa dang / gzhan don rgyun mi chad par 'byung bas sangs rgyas kyi phrin las chen po ste/ khyad chos bdun dang ldan pa'i phyir theg pa chen po'o/ /theg pa chen po de la dbye na rgyu mtshan nyid kyi theg pa dang / 'bras bu rdo rje'i theg pa gnyis su 'gyur ro/ /de'i dang po'i mtshan nyid ni/ gzhi spong ba lam du byed pas 'bras bu bsgrub par ston pa de'o/ /de'ang mdo las ji skad du/ 'dod pa rnams ni dug gi lo ma lta bu'o