[A:25]zhes bya ba la sogs pa dang / ngor chen thams cad mkhyen pas/ 'dod chags mi sdug rnam rtog rlung bgrang dang / /zhe sdang byams pa gti mug rten 'brel lam/ /zhes gsungs pa lta bu'o/ /gnyis pa'i mtshan nyid ni/ gzhi mi spong ba lam du byed pas 'bras bu sgrub pa'i thabs khyad par can ston pa de'o/ /de'ang ji ltar na/ gsang 'dus las/ chags can ye shes 'dod pa yis/ /rtag tu 'dod yon lnga rnams bsten/ /zhes dang / kye rdo rje las/ skye bo mi bzad pa yi las/ /gang dang gang gis 'ching 'gyur ba/ /thabs dang bcas na de nyid kyis/ /srid pa 'ching ba las grol 'gyur/ /zhes sogs gsungs pa lta bu'o/ /lam 'di gnyis la khyad par ci yod snyam na/ ma rmongs pa sogs bzhis phyi ma khyad par 'phags te/ gnas pa bsdus pa las/ don gcig na yang ma rmongs dang / /thabs mang dka' ba med pa dang / /dbang po rnon po'i dbang byas pa'i/ /sngags kyi bstan bcos khyad par 'phags/ /zhes so/ /de'ang rgyu mtshan nyid kyi theg pa dang / 'bras bu sngags kyi theg pa'i lam gnyis rtogs pa'i lta ba dang / mthar thug 'bras bu sangs rgyas dang / gzhi byang chub kyi sems rnams mtshan nyid mthun mod kyi/ de dag rgyud las bskyed pa'i thabs bzhis gsang sngags khyad par 'phags pa'i tshul ni/ pha rol tu phyin pa'i lam gyis so skye'i gnas skabs su rtog med kyi ye shes rgyud la bskyed pa mi srid la/ sngags la brten pas ni dbang dus dang lam dus su skyes pa'i ye shes kyis chos dbyings dpe'i tshul du rtogs