[A:26]nas/ des mtshon bya don gyi ye shes kyang myur du 'dren par nus pa'i phyir rtogs byed kyi thabs la ma rmongs pa ste/ kye rdo rje las/ skye bo mi zad pa yi las/ /gang dang gang gis 'ching 'gyur ba/ /thabs dang bcas na de nyid kyis/ /srid pa'i 'ching ba las grol 'gyur/ /zhes dang / 'dus pa'i rgyud phyi ma las/ thabs dang shes rab las byung ba'i/ /rdzogs pa'i rim pa'i sbyor ba yis/ /phung po khams dang skye mched gzugs/ /sngags pas sbyor ba nges byas la/ /zhes so/ /thun mong ba'i lam la thabs kyi khyad par ji snyed yod pa de snyed kyi steng du smin grol la sogs pa mchog dang thun mong gi dngos grub sgrub pa'i thabs zab pa dang rgya che ba mang du gsungs pa'i phyir thabs mang ba dang / phar phyin gzhung nas bshad pa'i shin tu bsgrub par dka' ba'i dka' spyad dang dka' thub rnams spyad pa med par gsang sngags pas spyod pa bde bas 'grub pa'i phyir dka' ba med pa ste/ gsang 'dus las/ dka' thub sdom pa mi bzad par/ /brten kyang 'grub par mi 'gyur te/ /'dod pa'i longs spyod thams cad la/ /brten na myur du 'grub par 'gyur/ /zhes sogs so/ /sngags kyi thabs la mkhas pa'i gang zag ni so so skye bo yin yang / lam la tshul bzhin du brtson pas 'bras bu bslu ba med par myur du 'grub pa'i phyir dbang po rnon po'i dbang du byas pa ste/ de nyid las/ 'di ni de bzhin gshegs pa'i sku/ /chos 'dzin mchog gi gsung dang ni/ /rdo rje 'dzin pa'i thugs dag kyang / /tshe 'di nyid la ster bar byed/ /ces so/ /de ltar khyad par 'phags pa'i rdo