[A:37]zag dman pa dang mchog gi mos pa dang / rang don dang gzhan don la 'jug pa'i rim pa dang / zab pa dang rgya che ba la dga' ba dang / drang don dang nges don dang sgra ji bzhin pa dang ji bzhin min pa la sogs pa sangs rgyas kyi dgongs pa mtha' yas pa yod pas/ de dag legs par shes nas thams cad 'gal med du rtogs nas 'chad shes pa zhig dgos mod kyi/ de ni ston pa de bzhin gshegs pa sras dang bcas pa'i thugs rje dang smon lam gyi mthus sprul pa'am/ lung gis nye bar bstan pa'i chos kyi snang byed du gyur pa/ gsung rab thams cad gzhan dring mi 'jog par 'grel ba'i spobs pa dang yon tan rgya mtsho'i bdag nyid du gyur pa'i mkhas shing grub pa'i skyes bu rnams kyi spyod yul du gyur pa las shes rlom gzhan gyi blo'i spyod yul du ma gyur pa ste/ ci'i phyir zhe na/ gsung rab thams cad sgra ji bzhin par 'dzin na phyin ci log tu 'gyur ba'i nyes pa yod de/ rnam bshad rig pa las/ kun tu snang ba'i mdo las kyang sgra ji bzhin du 'dzin na nyes pa lnga yod de/ lnga gang zhe na/ mi mos pa'i gnas su gyur pa'i nyes pa dang / rtsa ba nyams pa'i nyes pa dang / gzhan la slu bar byed pa'i nyes pa dang / ston pa la skur ba 'debs pa'i nyes pa dang / chos spong bar byed pa'i nyes pa'o zhes gsungs pa'i phyir ro/ /des na de'i rnam gzhag dngos la gsum ste/ bka'i don gang gis 'grel ba'i slob dpon/ ji ltar 'grel zhing bshad pa de ltar bkral ba'i bstan bcos so/ /dang po gang gis 'grel par byed pa'i slob dpon ni/ phal po che las/ ji