[A:41]yon tan dang ldan zhing / de'i ldog phyogs dang ldan pa ma yin par bsdus pa'i don de nyid kyis gzhung don rags pa go bar bzod pa ste/ de nyid du/ bsdus don tshig gsal brjod bde ba/ /ngag nyung tshig snyoms gzung bar sla/ /bsdus don nyid kyis gzhung go ba/ /de 'dra gang gis shes de mkhas/ /zhes so/ /gsum pa ni/ de nyid du/ gzhung lugs gang dang gang 'chad pa/ /byed pa'i tshig gis rab sbyar te/ /tshig don legs par sbrel nas ni/ /'chad pa brda sprod byed pa'i lugs/ /zhes gsungs pa ltar byed pa'i tshig drug la sogs pa dang sbyar nas 'chad pa ste/ de'ang mdo las dngos bstan gyi tshig don la tshig gi 'byed sdud dang rnam dbye las dang byed pa dang / bya ba rnams kyi tshig sbyar ba'i sgo nas ngag don nye bar len par byed pa ste/ dper na las ni 'bras chan la sogs pa dang / byed pa po ni lhas byin la sogs pa dang / bya ba ni 'tshed pa la sogs pa lta bu ste/ de bzhin du bshad par bya ba de'ang gang bshad/ gang gis bshad/ ji ltar bshad ces bya ba la sogs pa legs par sbyar te 'byung ngo / /gzhan yang seng ge'i lta stangs dang / sbal pa'i 'phar ba dang / rus sbal gyi bzhi 'gros dang / stag mo'i mchongs stabs dang bzhi'i sgo nas gzhung gi don blang bar bya ste/ de skad du'ang / las dang bya ba byed po yis/ /tshig don sbrel la ngag don blang / /zhes gsungs pa ltar ro/ /de'ang brjod bya ma nor bar ston pa la rjod byed kyi tshig bsgrigs legs pa la brten nas don 'tshol dgos pas/ thun mong du grags pa