[A:42]ming tshig yi ge gsum dang / brda sprod kyi bstan bcos dang / mngon brjod kyi bstan bcos rnams nas 'byung ba'i ming dang rtags dang tshig tu bsgrub pa'i tshul rnams la mkhas par gyur pa rnams kyis 'grel pa dang / de nas bshad pa'i chos gang dang gang yin pa de'i don 'grel pa la ma rmongs pa zhig la rag las pa ste/ de nyid du/ thog mar sgra la mkhas pa yis/ /tshig don rnam par phye ste bstan/ /de nas don la mkhas pa yis/ /lhag chad 'khrul pa med par bshad/ /ces gsungs so/ /bzhi pa ni/ mdo'i tshig don snga mas phyi ma 'dren mi nus pa dang / 'dren nus kyang mi gsal ba dang / tshig sbyor tshul dka' ba 'ga' zhig tshig snga phyi'i don 'di ltar 'grel zhes brjod pa tshig gi mtshams sbyor dang / mdor bstan rgyas bshad dam/ spang bya dang gnyen po'am rgyu dang 'bras bu la sogs pa phan tshun mtshams sbyor ba'i tshul gyis gzhung der dngos su gsal rung mi gsal rung skabs su ji ltar bab par bsnyad pa ste/ de skad du'ang / don ni mdor bstan rgyas bshad dam/ /'gal 'brel sgo nas mtshams sbyor byed/ /ces gsungs pa ltar ro/ /lnga pa ni mdo'i don rtogs par dka' ba'i gnas 'ga' zhig tu/ 'di dang 'di dag mi 'gal ba ji ltar yin zhe na zhes pa lta bu dri ba'am dogs pa khong nas bslangs te/ de dang de'i lan lung rigs dang mi 'gal bar bshad pas 'gal ba spong ba'i sgo nas gzhung don gtan la dbab pa yin te/ de nyid las/ brgal lan sgo nas gzhung gi don/ /lung dang rigs pas gtan la dbab/ /ces gsungs pa ltar ro/ /de la