[A:52]rab byed/ rnam bshad rigs pa/ las grub pa'i rab tu byed pa ste rang rgyud du brtsams pa lnga'o/ /gzhan 'grel du brtsams pa mdo sde rgyan gyi 'grel pa/ dbus mtha'i 'grel pa/ rten 'brel gyi mdo'i 'grel pa dang gsum mo/ /spyod pa'i cha ston pa ni/ byang sa'i tshul khrims kyi le'u dang / sdom pa nyi shu pa lta bu'o/ /gsum pa brjod bya don gyi sgo nas ni/ ji snyed pa ston pa'i bstan bcos dang / ji lta ba ston pa'i bstan bcos dang / thar pa dang thams cad mkhyen pa'i lam ston pa'i bstan bcos dang gsum du 'byed do/ /dang po la'ang phal pa dang / khyad par can gnyis las/ dang po ni/ lugs kyi bstan bcos shes rab brgya pa dang / skye bo gso thig dang / 'dul ba lung gzhi las 'byung ba'i brtag pa brgyad dang / brtag pa bco brgyad la sogs pa lta bu ste/ de dag kyang mngon mtho'i rgyu yin la/ thar pa'i rten du'ang 'gro srid de/ shes rab brgya pa las/ mi yi chos lugs legs spyad na/ /lha yul bgrod pa thag mi ring / /lha dang mi yi them skas la/ /'dzegs na thar pa gam na 'dug / ces gsungs so/ /gnyis pa ni/ rig pa'i gnas lnga'i bstan bcos las/ nang rig pa'i bstan bcos ma gtogs pa'i snga ma bzhi yan lag dang bcas pa ni gong du smos pa rnams so/ /gnyis pa ni/ rigs tshogs brgyad dang rgyan snang bden gsum chos dbyings bstod pa la sogs pa chos dbyings zab mo'i don bye brag tu ston pa rnams so/ /gsum pa ni/ rin chen phreng ba dang / gshes spring dang / bzhi brgya pa la sogs pa skyes bu gsum gyi lam ston pa