[A:60]shes pa'i ched du thos bsam la rim gyis slob pa'i tshul la gsum ste/ thos bsam gyi dgos pa bstan pa/ brgyud ldan gyi slob dpon bsten tshul/ thos bsam la rim par slob tshul lo/ /dang po ni/ 'phags mchog klu sgrub zhabs kyi bshes pa'i spring yig las/ mgo'am gos la glo bur me shor na/ /de dag phyir bzlog bgyi ba btang nas kyang / /yang srid med par bgyi slad 'bad 'tshal te/ /'di bas ches mchog dgos pa gzhan ma mchis/ /zhes gnas skabs tshe 'di dang phyi ma'i bde don tsam bsgrub pa'i zhar byung gi tshul gyis ma yin par 'jig rten 'di'i bde 'byor snying po med pa thams cad blos bor nas/ bsgrub par bya ba'i snying po'am gtso bo ni gzhan don du srid zhi'i mtha' la mi gnas pa'i mya ngan las 'das pa thams cad mkhyen pa'i go 'phang bsgrub par bya dgos te/ de sgrub pa'i thabs ni bslab pa gsum gyi lam la ma brten par mi 'grub pa'i phyir ro/ /de la'ang thog mar thos bsam bsgom gsum gcig la gcig ltos kyi tshul du go rim ma log par nyams su bstar dgos te/ mgon po byams pas/ 'di na dang po thos la brten nas tshul bzhin yid la byed pa 'byung / tshul bzhin yid la byed las yang dag don yul ye shes 'byung / /de las chos thob de yod de las blo gros rab tu skye/ /gang tshe de na so sor rang gir med na ji ltar nges/ /zhes dang 'phags pa klu sgrub kyis kyang / shes rab rgyas par byed pa thos pa ste/ /de dang bsam pa gnyis ni yod gyur na/ /de las bsgom pa la ni rab tu sbyor/ /des ni dngos grub bla na med par 'gyur/ /zhes