[A:77]nges shes bskyed dgos par sems so/ /gnyis pa ni/ bla ma lnga bcu pa las/ 'dir mang smos pa ci zhig dgos/ /bla ma dgyes byed gang yin bya/ /mi mnyes byed kun spang ba ni/ /de dang de la 'bad de brtag / ces bla ma ston par gyur pa gang yin pa de mnyes pa'i bya ba byed cing mi mnyes pa'i bya ba ni rnam pa thams cad du spang ba'i sgo nas bsten par bya ste/ sngon bdag cag gi ston pas tshigs su bcad pa re thos pa'i ched du lus dang longs spyod rnams kyang zhen pa med par btang ba dang / nA ro pas tai lo pa mnyes pa'i bya ba bsgrub pa la sogs pa rnams kyang bsams kyin yid ches bskyed do/ /'on te deng sang bstan pa nyams dmas shing / chos la gal chung byed pa'i dus 'dir bla ma chos smra ba'i phyir lus srog la ltos pa med pa'i dka' spyad de lta bu las dang po pas dngos su bsgrub nus pa gyur na/ sngon gyi skyes bu dam pa rnams kyi rnam par thar pa'i rjes su snyeg pa'i phyir rab tu gyur mod/ ma nus pa rnams kyang rim gyis bslab 'gyur gyi yul du byas nas/ las dang po pas da ltar dngos su bsgrub nus pa don yod rnam pa bzhi ste/ de'ang lus don yod pa'i phyir phyag 'tshal ba dang / bskor ba byed pa dang / mnyes pa'i las bsgrub/ ngag don yod pa'i phyir bla ma'i yon tan brjod pa dang / bstod pa 'don pa dang / gsol ba 'debs pa la sogs pa bya/ yid don yod pa'i phyir bla ma la sangs rgyas dngos yin snyam pa'i mos gus bsgom zhing / skyon gyi rtog pa thams cad spangs nas mdzad spyod thams cad sangs rgyas kyi mdzad