[A:81]sku dbon mthu stobs dbang phyug kun dga' bsod nams pa zung gis phebs shing gdan sar mdzad de chos srid zung 'brel gyi phrin las gser gyi 'khor los mdo khams kyi ljongs chen por dbang sgyur bar mdzad pa'i sa'i thig le de nyid du/ mkhar dkar dmar zhes pa'i bla brang khag gnyis byung ba'i mkhar dmar po'i bdag po drung pa kun dga' rgya mtsho zhes pa skar nag rtsis dang gso ba rig pa'i gzhung lugs la shin tu mkhas shing / dpal sa skya pa sngags 'chang ngag dbang kun dga' bkra shis grags pa'i rgyal mtshan dpal bzang po dang / mkhan chen 'jam pa'i dbyangs sangs rgyas phun tshogs pa dang / mkhan chen rdo rje 'chang shes bya bzang po la sogs pa las sdom pa gsum gyi bka' lung zab cing rgya che ba thob cing / de dag gi bslab bya rnams la gces spras su mdzad pa de nyid kyi drung du skra phud phul bas/ tshangs par spyod pa'i dge bsnyen gyi sdom pa phog ste/ kun dga' bsod nams zhes ming du gdags pa bcas thob pa'i brgyud pa ni/ 'og tu tshigs gsum rim nos kyi bstan pa la rim gyis slob pa'i skabs su dge bsnyen gyi sdom pa yang bskyar du thob pa'i brgyud par bsdoms pa las 'dir zur pa ma dgos so/ /gnyis pa sdom par gnas pas thos bsam ji ltar byas pa'i brgyud rim la gnyis te/ thun mong ba phyi rig pa'i gnas thos pa'i brgyud rim dang / thun mong ma yin pa nang rig pa'i gnas thos pa'i brgyud rim gnyis/ dang po ni/ theg pa chen po mdo sde rgyan las/ rig pa'i gnas lnga dag la brtson par ma byas na/ /'phags