[A:195]gdan bzhi sogs rgyud mang po'i bka' srung du 'dug pa dang bla ma yang thugs gtsigs che bar 'dug pa sogs nas 'dod khams ma 'dams te rdzogs par gsan/ de nas rngog tshang 'og mar grags pa'i rngog ston chen po bsod nams bstan 'dzin gyi bar du rigs dang chos kyi brgyud pa zam ma chad pa'i nges shes kyi gnas chen por gyur te rjes gnang sgrub skor dang bcas pa yongs su rdzogs par gsan/ phyogs der bla ma'i sku srog la bsdo ba'i bsgral bya'i zhing zhig 'dug pa chos bka' rnams rdzogs par gnang ba'i bka' drin gsob ched du chos skyong 'di'i sgo nas gtor ma la brten pa'i las sbyor mdzad pas ring por ma lon par rjes med du gyur pa sogs ngo mtshar yid ches dang ldan pa'i chos skor la/ dpal ldan lha mo 'dod khams kyi dbang phyug ma 'jigs byed dud pa'i sol ba can gyi chos skor gyi dkar chag snyan brgyud gsal ba'i me long zhes bya ba rdo rje 'chang tshar pa chos rjes mdzad pa/ de las bstan pa'i gdams pa la/ 'gor bla ma dam pa rnams la phyag 'tshal lo/ /dpal ldan lha mo'i sgo nas gtor ma'i rjes gnang byed par 'dod pas zhes yod pa'i lha mo phyi sgrub kyi rjes gnang gi yi ge rngog zhe sdang rdo rjes mdzad pa/
'di nyid kyi lag len gsal byed rngog bsod nams don grub kyis gzhung ri bo khyung lding gi chos grwar mdzad pa ni dpe ma 'byor pas ma thob/
'gor lha mo chen mo la phyag 'tshal lo/ /dang po rten rdzas thams cad tshogs par byas la zhes yod pa'i lha mo gsang sgrub kyi rjes gnang thun mong ma yin pa nan chags mar grags pa'i rtsa ba'i yi ge rngog zhe sdang rdo rjes mdzad