[A:231]grags shing shin tu rtsub 'gyur che zhing gnyan pas bka' dam par mdzad/ khyad par sbas pa'i mgon po la rigs mang du yod pa'i nang nas sbas pa'i mgon po'am dam tshig gi mgon po yin pas zhal bzhi yongs rdzogs kyi sku gzugs bris 'bur sogs kyang mi bzhed zhing / re gnyis byung ba dag kyang khyab gdal du ye mi ston pa gnad kyi gdams pa yin gyi/ deng sang 'di'i sku 'dri ba dang ston pa sogs bag med du byed pa rnams ni 'di dag rna bas ma thos shing 'tshub 'gyur mi 'byung ba sogs kyang chos skyong ye ma 'khor ba'i rtags so/ /des na dam tshig che phra kun la gces par mdzad pa smin grol gdams pa'i gnad mtha' dag ma nyams pa snyan brgyud mkha' 'gro'i kha rlangs thul le ba/ thos bsam gyis gtan la dbab byar snyan brgyud dang po byin rlabs dang rjes gnang / gnyis pa gdams pa dngos/ gsum pa bla ma dang mkha' 'gro chos skyong longs spyod kyis mnyes par byas pa la brten nas snyan brgyud bzhi pa'i rten 'brel shugs las 'grig pa'am/ yang na tshar pa rdo rje 'chang gis/ de yang thog mar tshogs kyi 'khor lo dang / /rin chen gser gyi maNDal la sogs pa/ /snyan brgyud dang po'i rten 'brel kun bsgrigs nas/ /snyan brgyud gnyis pa byin rlabs rjes gnang sbyin/ /snyan brgyud gsum pa gdams pa'i dngos gzhi 'di/ /bklag lung min par lag len dmar khrid du/ /byin pas snyan brgyud bzhi pa shugs las 'byung / /zhes pa ltar rdo rje slob dpon mnyes pa dngos grub kyi rtsa ba dang / shin tu bka' gnyan pa'i zab