[A:༤༣༡]གསུངས། ད་འགྲོ་བར་གདའ། སེམས་ཀྱི་འཁྲི་བ་ཅིག་ཀྱང་མེད། བློ་སྦྱོང་ན་འདུག་པའི་ཁ་རག་པའི་གཏུམ་རྒྱུད་དང་འདྲ་གསུངས། ཚེས་བཅོ་ལྔའི་ཉིན་ཕྱེད་ཡོལ་བ་ན་ལུས་ཉམས་མང་པོ་ཅིག་མཛད། གཽ་རཱི་ཙཽ་རཱི་ཞེས་སོགས་ཀྱེ་རྡོ་རྗེའི་འཁོར་གྱི་ལྷ་མོ་རྣམས་ཀྱི་སྔགས་མང་པོ་གསུང་གིན་འདུག །ཅུང་ཟད་ཅིག་ནས་ད་ལྟ་ལུས་ཉམས་མང་པོ་འབབ་ཀྱིན་གདའ་བ་སྐུ་ཁམས་མི་ལྕིའམ་ཞུས་པས། ཁམས་བདེ། ད་ལྟ་བདག་མེད་མ་ལྷ་མོ་བཅོ་ལྔའི་དཀྱིལ་འཁོར་ལ་ལྷ་ཐམས་ཅད་གར་བྱེད་པའི་སྣང་བ་བྱུང་ཤེས་པ་གསལ་པོ་ཡོད་གསུངས། དེ་ལྟར་ཐུགས་དམ་དང་དག་པའི་སྣང་བ་ཁོ་ནས་དུས་འདའ་བའི་ངང་ནས། ཚེས་བཅོ་ལྔའི་སྲོད་ལ་བབ་པ་ན་འདའ་ཀ་མའི་ཉམས་ལེན་ཁྱད་པར་ཅན་དང་བཅས་ཏེ་ཆོས་ཀྱི་སྐུའི་དབྱིངས་སུ། གཟུགས་ཀྱི་སྐུའི་བཀོད་པ་རེ་ཞིག་ཏུ་བསྡུ་བར་མཛད་དོ། །སྐུ་གདུང་ཞུགས་ལ་བཞེན་པའི་ཚེ་ཡང་རིང་བསྲེལ་ཁྱད་པར་ཅན་འགའ་ཞིག་བྱུང་ཞིང༌། གང་ཟག་ཐ་དད་ཀྱི་གདུང་སྐལ་རྣམ་ལ་ཡང་རིང་བསྲེལ་མང་པོ་བྱོན་ནོ། །དམ་པ་དེ་ཉིད་ཀྱི་བྱིན་རླབས་འཇུག་ཅིང་ཐུགས་ཀྱི་དགོངས་པ་རྫོགས་པའི་ཆེད་དུ་བདག་གིས་རྒྱལ་བ་རྡོ་རྗེ་འཆང་ནས་རྗེ་ཉིད་ཀྱི་བར་གྱི་གསུང་ངག་རིན་པོ་ཆེའི་བླ་མ་བརྒྱུད་པ་རྣམས་གཙོ་བོར་གྱུར་པ་ལ། བླ་མ་བརྒྱུད་པ་ལ་ཡི་དམ་མང་པོས་བསྐོར་བའི་བྲིས་སྐུ་བཅུུ་གཅིག་བཞེངས་ཏེ། དེའི་རས་འདུལ་ལ་རྗེ་ཉིད་ཀྱི་གདུང་དྲི་བཟང་པོ་དང་ལྷན་ཅིག་ཕྱེ་མར་བྱས་ཏེ་བགོ་བའི་ཆེད་དུ་གདུང་བཏགས་པའི་གསེབ་ནས་རིང་བསྲེལ་ཁྱད་འཕགས་གཉིས་བྱོན་ཏོ། །དམ་པ་གང་གི་ངང་ཚུལ་སངས་རྒྱས་དང༌། །ཐ་དད་མེད་ཕྱིར་བདག་ལྟས་རྟོགས་པར་དཀའ། །འོན་ཀྱང་དད་པས་མདོ་ཙམ་བྲིས་འདི་ལ། །གྲུབ་ཆེན་བླ་མའི་བྱིན་རླབས་འཇུག་པར་ཤོག །དྲིན་ཆེན་རྩ་བའི་བླ་མ་དམ་པ་མཁས་དང་གྲུབ་པའི་དབང་ཕྱུག་རྡོ་རྗེ་འཆང་གཉིས་པ་བུདྡྷ་ཤྲཱིའི་རྣམ་ཐར་མདོར་བསྡུས་པ་འདི་ནི་རྗེ་དེ་ཉིད་ཀྱི་ཞབས་རྡུལ་སྤྱི་བོས་བླངས་པ་ཤཱཀྱའི་དགེ་སློང་ཀུན་དགའ་བཟང་པོས་དཔལ་ས་སྐྱའི་ཆོས་གྲྭ་ཆེན་པོར་སྦྱར་བའོ།། །།