[A:173]པདྨ་ཕྲིན་ལས། རྣམ་སྲས་གླིང་པཎྜི་ཏ་ཆེན་པོ་དཀོན་མཆོག་ཆོས་གྲགས། དེས་བདག་གོ །
༈ མྱུར་མཛད་ཡེ་ཤེས་མགོན་པོ་ཕྱག་དྲུག་པའི་ཆོས་སྐོར་ལ། རྒྱུད་ནི་བུ་སྟོན་རིན་པོ་ཆེས་ཐེ་ཚོམ་གྱི་གཞིར་བཞག་ཀྱང༌། བླ་མ་ཕལ་ཆེར་ཚད་མར་འཛིན་པའི་མགོན་པོ་གསང་བ་དངོས་གྲུབ་འབྱུང་བའི་རྒྱུད་ཀྱི་ལེའུ་བཅུ་བཞི་པར། མགོན་པོ་ཀུན་གྱི་གནས་འདི་ནི། །ཞལ་གཅིག་པ་ལ་ཕྱག་དྲུག་པ། །དང་པོ་གྲི་གུག་ཐོད་ཁྲག་འཛིན། །སྤྱན་གསུམ་མཐིང་ནག་རྔམ་པ་ཡི། །གཡས་གཡོན་བར་པ་ཕྲེང་བ་དང༌། །ཌ་མ་རུ་ནི་འཛིན་ཅིང་བརྡུང༌། །མཐའ་མ་གཉིས་ཀྱིས་ཁ་ཊྭཱཾ་དང༌། །སྡིག་མཛུབ་ཞགས་པས་འཆིང་བར་མཛད། །ཅེས་དང༌། ཤངས་པ་རྣམས་ཀྱི་རང་སྐད་ལ་རྒྱུད་ཚད་ལྡན་རྟ་མགྲིན་གྱིས་གསུངས་པའི་ལེའུ་བརྒྱད་པའི་ལེའུ་གཉིས་པར། ནག་པོ་ཞལ་གཅིག་ཕྱག་དྲུག་པ། །གྲི་གུག་བགྲང་ཕྲེང་ཌ་མ་རུ། །ཐོད་པ་མདུང་དང་ཞགས་པ་རྣམས། །ཞེས་དང༌། རྭ་འགྱུར་མགོན་པོ་གསང་བ་མངོན་པར་འབྱུང་བའི་རྒྱུད་ལེའུ་ལྔ་བཅུ་པ་ལས། ཞལ་གསུམ་ཕྱག་དྲུག་པ་ལྷ་མོ་བཞིའི་འཁོར་དང་བཅས་ཟུར་ཙམ་བསྟན་ནོ། །མཁས་གྲུབ་ཁྱུང་པོ་གདུབ་བུ་པས་ཀོ་ས་ལ་བིཀྵའི་དུར་ཁྲོད་དུ། རྗེ་བཙུན་མཻ་ཏྲི་པ་ལ་གསེར་སྲང་བདུན་ཕུལ་ནས་ཞུས། མཁས་གྲུབ་ཁྱུང་པོ་འཕན་ཡུལ་འཇོག་པོའི་རི་ལ་སྒྲུབ་པ་མཛད་པའི་ཚེ་གྲུབ་ཆེན་རཱ་ཧུ་ལས་ཆོས་སྒོ་སྐྱེལ་གྱི་ཚུལ་དུ་གནང་བའི་སྐོར་རྣམས་བསྡོམས་པས་མཉམ་མེད་རི་བོ་དགའ་ལྡན་པ་ལ་མགོན་པོའི་བཀའ་བཅུ་གསུམ་དུ་གྲགས་པ། རྡོ་རྗེ་འཆང་སྔགས་རམ་པ་དགེ་འདུན་བཀྲ་ཤིས་ཀྱིས་མཛད་པའི་ཡི་གེའི་སྟེང་ནས། གཏོར་དབང་བར་གཅོད་ཀུན་སེལ། རྗེས་གནང་བར་གཅོད་ཀུན་སེལ། དབང་བཞི་བྱིན་བརླབས་ཀྱི་ཚུལ་དུ་བསྐུར་བ། བླ་མགོན་དབྱེར་མེད་ཀྱི་སྐོར་ལ་ཞི་བ་གྲིབ་སེལ། རྒྱས་པ་བླ་མ་མགོན་པོ་དབྱེར་