[A:93]རཀྵི་ཏའི་རྒྱ་གཞུང་དང༌། འཇིགས་བྱེད་ཀྱི་ལས་མཐའ་རྣམས་ན་གཏི་མུག་གཤིན་རྗེ་གཤེད་སོགས་གསལ་བར་བཤད་པའི་ཕྱིར་རོ། །རོ་ལངས་བརྒྱད་བསྐོར་གྱི་དཀྱིལ་ཆོག་ཨ་མོ་གྷ་བཛྲས་མཛད་པ་ལས། དབུས་ལྟེ་བ་ཟླུམ་པོ་རེའུ་མིག་དགུ། དེའི་ཕྱི་རོལ་ཏུ་སྣམ་བུ་ཟླུམ་པོས་བསྐོར་བ། དེའི་ཕྱི་རོལ་གྲུ་བཞི་སྒོ་བཞི་སོགས་གསུངས་ངོར་དང་སྒྱི་ཆུ་དང་རྒྱུད་དང་མཐུན། ལ་ལི་ཏ་བཛྲ་གྱིས་མཛད་པའི་རོ་ལངས་བརྒྱད་བསྐོར་ཆུང་བ་ལས། གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་མཛེས་ནས། དེ་བཞིན་ཟླ་བ་ཕྱེད་པས་སོ། །དེ་ཡི་དབུས་སུ་འཁོར་ལོ་ནི། །རེའུ་མིག་དགུ་པ་ཟླུམ་པོའོ། །ཞེས་དང༌། འཕགས་པ་རིན་པོ་ཆེའི་དཀྱིལ་ཆོག་ཏུ་ཐོད་པ་སྐམ་པོའི་ར་བ་ཟླུམ་པོ་ཞེས་གསུངས་སོ། །རྨོངས་པའི་བརྒྱུད་པ་དག །གཞལ་ཡས་ཁང་གྲུ་བཞི་པའི་ནང་དུ་གཞལ་ཡས་ཁང་ཟླུམ་པོ་འདོད་སྣམ་ལ་ཀེང་རུས་ཀྱི་ལྷ་མོ། རྒྱུ་མའི་དྲ་བ་སོགས་བྱེད་པ་ནི་བསོད་ནམས་དམན་པའོ།། །།