[A:༤]
སྒྲུབ་ལ་བརྩོན་ཚེ་མཚན་གཅིག་བདག་མེད་མས།
། །སྙན་བརྒྱུད་བཞིས་གདམས་དེ་ཚེ་ས་དྲུག་མནན།
།དེ་ཉིད་བརྟེན་ནས་དམན་རྣམས་བསྒྲལ་བའི་ཕྱིར།
།ཉིད་ཀྱིས་བིརྺར་ཞལ་བཞེས་གྲོང་དུ་གཤེགས།
།གངྒཱ་ལྡོག་ཅིང་གདུག་ཅན་རྒྱལ་པོ་བཏུལ། །ཉི་མ་བཟུང་ཞིང་ཡུལ་ཁམས་བཅོ་བརྒྱད་ཀྱི། །མྱོས་བྱེད་གསོལ་ཡང་མྱོས་མིན་ལིང་ག་བཀས། །གཏུམ་མོ་བཅོམ་ཞིང་སྨིན་དྲུག་བུ་ཡང་བཏུལ། །དེ་ལྟར་འགྲོ་བའི་དོན་ནི་མཛད་ནས་ཀྱང༌། །རྡོ་རྗེ་སྐུ་གསུང་ཐུགས་དང་དབྱེར་མེད་གྱུར། །རྗེ་བཙུན་དཔལ་ལྡན་ཆོས་སྐྱོང་བིརྺ་པ། །རྟག་ཏུ་གཞན་དོན་མཛད་ལ་མགོས་ཕྱག་འཚལ། །འདིའི་ལོ་རྒྱུས་ནི། རྣལ་འབྱོར་གྱི་དབང་ཕྱུག་བིརྺ་པ་ཞེས་བྱ་བ་འདི་རྒྱལ་པོའི་རིགས་རྒྱལ་སྲིད་སྤངས་པ་ཅིག་ཡིན་པ་ལ། དཔལ་ནཱ་ལེནྡྲ་ན་སྤྱིར་སྡེ་པ་བཞི་ཡོད་པ་ལས། གཞི་ཐམས་ཅད་ཡོད་པར་སྨྲ་བའི་སྡེ་པ་མཁན་པོ་དྷརྨ་མི་ཏྲ་ཞེས་བྱ་བའམ། རྣམ་པར་རྒྱལ་བའི་ལྷ་ཞེས་བྱ་བ་ལས་རབ་ཏུ་བྱུང་སྟེ། མཚན་ཡང་ཤྲཱི་དྷརྨ་པཱ་ལ་ཞེས་བྱ་བར་བཏགས། མཁན་པོ་དེ་ཉིད་ཀྱིས་འཁོར་ལོ་བདེ་མཆོག་གི་གདམས་ངག་ཀྱང་གནང༌། སྤྱིར་ཡང་རང་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པར་གྱུར་ཏོ། །དེ་ནས་མཁན་པོ་དེ་འདས་པ་དང༌། དཔལ་ནཱ་ལེནྡྲའི་གཙུག་ལག་ཁང་གི་པཎྜི་ཏ་ཐམས་ཅད་ཀྱི་མཁན་པོ་ཆེན་པོར་གྱུར་ཏོ། །དེ་ལྟར་གྱུར་ཀྱང་རང་ཉིད་ཀྱིས་བསྒྲུབ་པ་ནི་འཁོར་ལོ་བདེ་མཆོག་གི་རྣལ་འབྱོར་པ་ཡིན་ལ། སྒྲུབ་པ་ཡུན་རིང་དུ་མཛད་ཀྱང་རྟགས་སམ་དངོས་གྲུབ་ཏུ་ངེས་པ་གང་ཡང་མ་ཐོབ་ལ། སླར་མི་འཚམ་པ་དུ་མ་བྱུང་ནས་ཐུགས་མུག་སྟེ། ད་ཕན་ཆད་ཆོས་རྩོམ་པ་དང༌། འཆད་པ་དང་དགེ་འདུན་གྱི་བྱ་བ་ལས་ཡི་དམ་ལྷའི་སྒྲུབ་པ་མི་བྱེད་དོ་ཞེས་དམ་བཅས་ནས། དཔྱིད་ཟླ་ར་བ་ས་གའི་ཉི་ཤུ་གཉིས་ཀྱི་ནུབ་མོར་ཕྲེང་བ་འཆག་ཁང་དུ་བསྒྱུར་ནས་ཅི་བདེར་གནས་སོ། །དེའི་ནུབ་མོ་རྨི་ལམ་དུ་བདག་མེད་མ་ཐ་མལ་པའི་བུད་མེད་སྔོན་མོའི་གཟུགས་སུ་