[A:157a-503] / /de yang khyed sku bgres pas sku gzhon pa'i thugs dang bstun lugs rnams thams cad du gal che ba 'di mi rgan gyi tha tshig tu 'dzin pa rang cig ces kyang mdzod cig ces bka' stsal ba na/ mi dbang chen pos/ bka' phebs pa de rnams spyi bo'i gtsug tu 'khur ba lags tshul gyi zhu lan rgyas par phul ba'i mthar/ bdag gis lam bsdus dus de gso ba zhig zhus pa na ji ltar yong zhu ba la/ de cis kyang legs/ da lta gso ba legs gsung zhing/ mchod yon lhan du lam bsdus dus kyi dbang len pa mdzad pa'i dbang bzhi pa la thug pa dang dus mnyam par byang khang gsar ba'i gsol ja sleb pa dus 'grig pas rten 'brel shin tu legs gsung zhing/ de nas gsol ja bzhes zin 'phral du nged kyis sde pa la rten 'brel cig sgrig pas li 'gu thong gsung ba bzhin phyag tu phul bas/ rgyun gyi gsang chab chab 'dzin pa'i mnyel babs des chab gar ma cung zad re las 'ong gi med na'ang/ de dus gsang chab shin tu dwangs pa zhal dkar khengs lhag pa zhig gnang te/ de mi dbang chen po'i zhal dkar du blug/ 'di la rten 'brel gyi sgo chen po yod pas lhag ma lus par gsol shig gsung ba phebs shing/ mi dbang chen pos kyang shin tu bzhes spro ba'i rnam par mdzad de