[A:༤༡༩]པ་རྣམས་ཀྱི་དབང་དུ་སོང་ནས་པུར་སྦྱངས་པས། འདི་ཡི་ལུས་ནི་བདེ་མཆོག་འཁོར་ལོ་སྟེ། །གསུང་ནི་མ་ཧཱ་མཱ་ཡའི་བདག་ཉིད་འགྱུར། །ཐུགས་ནི་དཔལ་ལྡན་དགྱེས་པ་རྡོ་རྗེ་སྟེ། །སྤྲུལ་པའི་གནས་མཆོག་གསང་བ་འདུས་པ་ལ། །གསང་གནས་བདེ་སྐྱོང་གཤིན་རྗེ་གཤེད་དུ་འགྱུར། །ཞེས་པ་དང་མཚུངས་པར། ལྷ་སྐུ་དང་རིང་བསྲེལ་གྱི་ཕུང་པོར་སོང༌། དེང་སང་ཡང་ཤངས་ཆོས་ཁུངས་བཙུན་གྱི་རྒྱུན་མ་ཆད་པ་ཚར་ཆེན་གྱི་ཐུགས་རྗེ་ཁོ་ནར་མངོན་ནོ།། ༈
དྲུག་པ་པཎ་ཆེན་བསོད་སྙོམས་པ་ཆེན་པོ་ནི། ཀུན་མཁྱེན་ཆོས་སྐུ་འོད་ཟེར་གྱིས་པཎ་ཆེན་གྱི་སྔོན་གནས་དྲན་ཞིང་ཆོས་འོད་ཡིན་པ་རྗེ་མཁྱེན་བརྩེའི་མནལ་ལམ་གྱིས་ཤེས་ནུས་པས། རྒྱ་གར་ནུབ་ཕྱོགས་ཁ་ཆེ་ཁྲི་བརྟན་དུ་ཡབ་ཚོང་དཔོན་སྲིད་བརྟན་ཡུམ་དགེ་བ་མ་གཉིས་ཀྱི་སྲས་སུ་མེ་མོ་ལུག་གི་ལོ་ལ་སྐུ་བལྟམས། སྤྱིར་མ་བྱོན་སངས་རྒྱས་གསུམ་པ་རབ་གསལ་གྱི་རྣམ་པར་སྤྲུལ་པ་ཡིན་པས་འཕགས་པའི་གང་ཟག་གི་ཡོན་ཏན་དཔག་པར་དཀའ་ཞིང་ཐུན་མོང་བའི་སྣང་ངོར་ཡང་ཆུང་ངུའི་དུས་ནས་ཡིག་རྩིས་སྒྲ་སྙན། སྡེབ་སྦྱོར། མངོན་བརྗོད། ཟློས་གར་དང་གཞན་ཡང་རིག་པའི་གནས་བཅོ་བརྒྱད་ལ་མཁས་པའི་རྩེར་སོན། མཁན་པོ་ཆེན་པོ་ཨཱ་ཀཱ་ར་གུཔྟ་ལ་བསྙེན་པར་རྫོགས་ཏེ་ཚུལ་ཁྲིམས་རྣམ་པར་དག་པས་གནས་བརྟན་འདུལ་བ་འཛིན་པ་ཀུན་གྱི་གཙུག་གི་ནོར་བུར་གྱུར། ཐུན་མོང་བ་ནང་རིག་པ་སྡེ་སྣོད་གསུམ་དང་ཐུན་མོང་མིན་པ་གསང་ཆེན་རྡོ་རྗེ་ཐེག་པ་ལ་སྦྱངས་པས་མཁས་གྲུབ་ཀྱི་སྙན་པས་ས་སྟེང་ཁྱབ། ཁྲོ་ཕུ་བ་གནུབས་བྱམས་པའི་དཔལ་ལོ་ཙཱ་མཛད་བཞེད་ཀྱིས་མང་ཡུལ་སྐྱིད་གྲོང་དུ་བཞུགས་དུས་