[A:༤༨༣]ཏུ་འབྱུང༌། སྟོན་བོ་དོང་དུ་རྗེ་བཙུན་སྒོ་རུམ་པ་ཆེན་པོ་ལ་དཔལ་དུས་ཀྱི་འཁོར་ལོའི་བདག་པོ་ཆེན་པོའི་བར་གྱི་དབང་ཡོངས་སུ་རྫོགས་པ་དང་གུར་མགོན་གྱི་མན་ངག་སོགས་ཆོས་བཀའི་རིགས་རྒྱ་ཆེར་གསན། སྔོན་ཡར་ཀླུངས་པ་དང་འཇམ་དབྱངས་སྒེག་པ་དཔོན་སློབ་ཏུ་གྱུར་པའི་རྟེན་འབྲེལ་དུས་འདིར་འགྲིག་ཚུལ་ཀུན་མཁྱེན་མཁྱེན་བརྩེའི་རྣམ་ཐར་དུ། བདག་གིས་བླ་མ་དམ་པའི་དྲུང་ན་མཇལ་ཞིང་གསུང་ཆོས་འདྲའང་གསན་གྱི་འདུག་པ་མཐོང་བས་སྔར་ཡེ་མ་མཇལ་ནའང་འདྲིས་འདྲིས་འཐད་འཐད་འདྲ་མོ་ཞིག་གིས་སེམས་ལ་དགའ་ཚོར་དང་བླ་མའི་དགའ་བ་ལ་བསམ་པ་དུང་དུང་པ་བྱུང༌། རྗེ་འདར་ཕྱོགས་ལ་ཕེབས་ཁར་བདག་ཡོད་སར་ཐོལ་གྱིས་བྱོན་བྱུང་ནས་གོས་ཆེན་ལྕགས་ནག་ཁ་དོ་པ་ཞིག་དང་སྟོང་སྐུད་དམར་པོ་མང་པོ་ཞིག་གནང༌། འདི་ལ་ཕྱག་འཕྲེང་ཐག་པ་བཞིན་མཛོད་གོས་ཆེན་འདི་ལ་བྲིས་སྐུ་ལྟ་བུ་མཛད་དམ་གང་ནའང་མི་ལ་མ་གནང་བར་ཕྱག་ཚགས་མཛོད། རྟེན་འབྲེལ་ཞིག་ཡོད་དོ་གསུངས་ཤིང་ཞལ་འཛུམ་མང་པོ་མཛད་ཀྱིན་འདུག་པ་དེ་དུས་ནི་དགའ་བ་ལ་བསམ་པ་ལས་མ་བྱུང༌། ད་བསམས་ན་མགོན་པོ་ཆེ་ཆུང་འདི་རྣམས་ཐོབ་པའི་རྟེན་འབྲེལ་སྒྲིག་པ་གནང་བར་འདུག་གོ །རྒྱལ་བའི་དགོངས་པ་ཟབ་གསལ་མཁའ་དབྱིངས་ལས། །ཚུར་མཐོང་བྱིས་པས་སྤར་ཚོད་ཅི་ཞིག་ཐིངས། །དུས་གསུམ་གསལ་བར་མཁྱེན་དེས་བདག་ལྟ་བུའང༌། །སྙན་བརྒྱུད་གདམས་པའི་སྣོད་དུ་རུང་བར་དགོངས། །དམ་པའི་ཞལ་བཞེས་རྡོ་ཡི་རི་མོ་བཞིན། །འགྱུར་མེད་བདེན་པས་ཐུགས་ལ་བཏགས་ན་ཡང༌། །