[A:༤༨༥]གནང༌། རྒྱལ་པོ་ཆེན་པོ་རྣམ་ཐོས་སྲས་སེར་ཆེན་རྟ་བདག་བརྒྱད་ཀྱིས་བསྐོར་བ། ལྗང་གུ་ཀླུ་བརྒྱད་ཀྱིས་བསྐོར་བ། མཐིང་ཁ་ལྷ་མོ་བརྒྱད་ཀྱིས་བསྐོར་བ། སློབ་དཔོན་པདྨ་སཾ་བྷ་ཝ་ལུགས་ཀྱི་སྤྲིན་གསེབ་མ་རྟ་བདག་བརྒྱད། ཡང་གསང་དྲག་པོ་མདུང་དམར་ཅན་རྟ་བདག་བརྒྱད་དང་བཅས་པ་རྣམས་ཀྱི་རྗེས་གནང་དང་རྣམ་སྲས་སྐོར་གྱི་ཡིག་སྣ་ཁ་ཤས། དམར་པོ་སྐོར་གསུམ་གྱི་རྒྱུན་གང་ཡོད། དཔལ་ཚོགས་ཀྱི་བདག་པོ་ཇོ་བོ་རྗེའི་ག་ག་མ་དཀར་པོ་ཕྱག་བཞི་པ། ཆགས་པའི་རྡོ་རྗེ་སོགས་ཀྱི་རྗེས་གནང་དང་ཡིག་སྐོར་རྣམས་གསན། ཁ་སྐོང་དཀར་ཆགས་ལས། འོན་ཀྱང་འཆམ་དང་འགྲོས་ཀྱི་སྤྲོས་པ་ནི། །འདོད་ན་རྡོ་རྗེ་གདན་པ་ལས་གཞན་པའི། །ཚད་ལྡན་མེད་ཕྱིར་དེ་ཡི་ལུགས་བཞིན་སྟོན། །ཅེས་པའི་དོན་ལྟར་མགོན་པོ་ཆེ་ཆུང་གཉིས་ཀྱི་འཆམ་དབྱངས་སོགས་ཀྱི་ཕྱག་ལེན་དཔྱིས་ཕྱིན་པར་སྦྱོང་བདར་མཛད། དཔོན་སློབ་གཉིས་ཆོས་སྐྱོང་སྐོར་ལ་གོ་བསྡུར་གནང་ནས་དེང་སང་བོད་ན་ས་སྐྱ་པའི་ཆོས་སྐྱོང་ལ་ངེད་རང་གཉིས་ལས་མཁས་པ་མེད་པ་འདྲ་ཞེས་ཀྱལ་ཀ་གསུངས་སྐད། ཞབས་ཆེར་བསྙུན་ཡང་གཙང་ཆུར་འཇུག་པ་སོགས་ལས་གཞན་མའི་འཕྲོད་བསྟེན་གྱི་སྤྲོས་པ་དོར་ཏེ་ཐོས་བསམ་ལྷུར་མཛད་པས་ཀུན་ཧ་ལས་ཏེ་ཆོས་སྡེའི་གྲྭ་རིགས་རྣམས་ཡོན་ཏན་གྱི་སྦྱོང་བདར་དྲན་བསྐུལ་ལ་དེ་ལས་ལྷག་པ་མ་བྱུང་ཟེར།