[A:༤༨༨]སུ་གཏད། བྱང་གཏེར་གྱིས་ཐོག་དྲངས་པའི་གསང་སྔགས་རྙིང་མའི་ཆོས་སྐོར་ཆེས་མང་བ་གསན། དཔོན་སློབ་གཉིས་ཅར་ཕན་ཚུན་ཐུགས་ནང་ཤིན་ཏུ་དག་ཅིང་འདར་ཕྱོགས་སུའང་སྤྱན་འདྲེན་ཆེད་བསྟད་གནང་ནས་ཞབས་ཏོག་ཆེན་པོ་མཛད། རྗེས་སུའང་ཤར་ཕྱོགས་ལ་ཕེབས་རེས་ཀྱིས་མཇལ་ཙམ་རེ་མཛད་ཅིང་བཀའ་ཆོས་གང་འོས་རེ་ཡང་ངེས་པར་གསན། ལྡོང་གི་སྔགས་འཆང་ཆེན་པོ་ཆོས་སྐྱོང་བསོད་ནམས་བཀྲ་ཤིས་པར་གཏེར་ཁ་མི་འདྲ་བ་ཉི་ཤུ་ཙམ་གྱི་དབང་ལུང་གསན་པར་ཕེབས་པའི་ཚེ་སྔགས་འཆང་རིན་པོ་ཆེས་ཁྱེད་དཔོན་སློབ་རྣམས་མ་བྱོན་པའི་ཞག་གསུམ་ཙམ་གྱི་ནུབ་སྔགས་གཞོན་དཀར་པོ་ཞིག་བྱུང་ནས་ཁྱོད་ལ་ངའི་ཆོས་སྐོར་རྣམས་ཞུ་བ་ལ་མི་ཞིག་འོང་བར་ཡོད་པས་དེ་ལ་རྫོགས་པར་གཤོད་དེ་ངས་བྱིན་གྱིས་བརླབས་པ་ཡིན་གསུང་བ་བྱུང་གསུངས། དྲིན་ཅན་སངས་རྒྱས་རྣམ་རྒྱལ་ལ་ཤངས་པ་བཀའ་བརྒྱུད་ཀྱི་ལམ་ཡོངས་རྫོགས་གསན་ཅིང་ཡབ་མེས་བརྒྱུད་པའི་བླ་བརྒྱུད་ཡིན་ཅེས་ཤིན་ཏུ་གུས་པར་མཛད། བྲག་དཀར་སེམས་དཔའ་ཆེན་པོ་བསོད་ནམས་རྒྱལ་མཚན་ལ་ཕྱག་རྡོར་འཁོར་ཆེན་ལམ་ཡོངས་རྫོགས་སོགས་ཆོས་མང་དུ་གསན། བཟད་གཡུ་གོང་པར་ཡེ་ཤེས་མགོན་པོ་ཕྱག་དྲུག་པའི་ཟབ་ཆོས་གཞན་ནས་མ་རྙེད་པ་དུ་མ། བྱང་སྟག་ལུང་སྦས་དོན་པ་ལ་ཕག་གྲུ་ལུགས་ཀྱི་ཕྱག་བཞི་པའི་ལམ་ཡོངས་རྫོགས་བསམ་སྡིངས་མཁན་ཆེན་སངས་རྒྱས་ཡེ་ཤེས་ལ་མགོན་པོ་ལྷ་ཆེན་དཔལ་འབར་གྱི་རྗེས་གནང༌། རྭ་སྒྲེང་མཁན་པོ་དཔལ་འབྱོར་བསམ་གྲུབ་ལ་མིའུ་ཐུང་གསོད་བྱེད་ཀྱི་རྗེས་གནང༌། ཇོ་སྟན་རོང་ཤཱཀ་པ་བཀྲ་ཤིས་རིན་ཅེན་ལ་ཨ་ཏི་ལམ་ཡོངས་རྫོགས་