[A:113]གཞན་ཡང་དབུས་ཕྱོགས་འདི་ན་ཟུལ་ཕུ། སྐྱོར་མོ་ལུང༌། དགའ་བ་གདོང༌། གྲོ་ས་རྣམས་ན་འདུལ་བའི་བཤད་རྒྱུན་རིང་དུ་ཡོད་ལ། ཁྱད་པར་གྲོ་སར་དམར་སྟོན་ཆེན་པོ་ཁུ་དབོན་གྱིས་སྡེ་སྣོད་འཛིན་པ་ཆེན་པོ་འདུལ་བ་དོན་དུ་གཉེར་བ་རྣམས་ཀྱི་རྟེན་ས་མཛད་པ་ཡིན་ཏེ། དེང་སང་ནི་འདུལ་བའི་ཆོས་སྨྲ་བ་རྣམས་ཀྱི་མཆོག་གནས་བརྟན་ཆེན་པོ་དགེ་ལེགས་དཔལ་ཞེས་བྱའོ། །དུས་ཀྱི་དབང་གིས་དགེ་སློང་ལྷོད་པ་ཡང་མང༌། རབ་བྱུང་བ་ནི་རྗེ་བཙུན་དམ་པ་བློ་བཟང་གྲགས་པའི་དཔལ་གྱིས་དང་པོ་སྐྱོར་མོ་ལུང་དུ་མཁན་ཆེན་བློ་གསལ་བ་ལ་འདུལ་བ་ལེགས་པར་བསླབས། ཕྱིས་དབེན་པའི་གནས་རྣམས་སུ་སྒྲུབ་པ་སྙིང་པོར་མཛད་པ་ན་ཡང་འདུལ་བའི་ཀུན་ཏུ་སྤྱོད་པ་ལས་མ་འདས། ཕྱིས་འཁོར་སྐྱོང་བའི་ཚེ་ན་ཡང་དྲུང་ན་འཁོད་པ་ཐམས་ཅད་འདུལ་བ་ནས་ཇི་སྐད་བཤད་པའི་ཆོས་གོས་གསུམ་གདིང་བ་དང་ལྷུང་བཟེད་ལ་སོགས་པ་མཁོ་བའི་ཡོ་བྱད་རྣམས་འཛིན་དུ་བཅུག །ཇོ་བོ་ཆེན་པོ་རྗེ་ལྷ་གཅིག་གི་མན་ངག་ལ་བརྟེན་ནས་སྐྱེས་བུ་གསུམ་ལ་བློ་སྦྱངས་ནས་འཁོར་བ་མཐའ་དག་ལ་ཡིད་འབྱུང་བའི་བློས་སྡོམ་པ་ཐམས་ཅད་སོ་སོར་ཐར་པ་མཚན་ཉིད་པ་ལ་བཀོད། དེ་དག་གི་སྤྱན་ལྟོས་ལ་བརྟེན་ནས་བོད་ཀྱི་ཁམས་འདིར་འདུལ་བའི་བསྟན་པ་ཉི་མ་ཤར་བ་ལྟར་གྱུར་པ་ཡིན་ནོ། །མངའ་རིས་སྟོད་དུ་མངའ་བདག་སྲོང་ངེས་ཡབ་མེས་ཀྱི་སྲོལ་དང་བསྟན་པ་ལ་ཤིན་ཏུ་དད་ཀྱང༌། དེའི་ཚེ་མཁན་སློབ་མེད་པས་ཡབ་སྲས་གསུམ་གས་དཀོན་མཆོག་གི་དྲུང་དུ་རང་རྟགས་བླངས་ཏེ། ཁོང་རང་གི་མཚན་