[A:114]ཡང་ཡེ་ཤེས་འོད་དུ་བསྒྱུར། ཕྱིས་རྒྱ་གར་ཤར་ཕྱོགས་ཀྱི་པནྚི་ཏ་དྷརྨ་པཱ་ལ་སྤྱན་དྲངས་ནས་མང་པོ་བསྙེན་པར་རྫོགས་ཤིང༌། འདུལ་བའི་ལག་ལེན་རྣམས་བསླབ་པ་ལ་སོགས་པའི་གཏམ་ནི། ཞིང་མོ་ཆེ་བ་བྱང་ཆུབ་སེང་གེས། ཕྱི་མ་མངའ་རིས་འདུལ་འཛིན་ལ། རྒྱ་གར་བརྒྱུད་པ་ཡོད་པར་བཞེད། །དེ་ཡང་སྒྲུབ་པའི་བརྒྱུད་དང་ནི། །བཤད་པའི་བརྒྱུད་དང་རྣམ་པ་གཉིས། །སྒྲུབ་པའི་བརྒྱུད་པ་འདི་ལྟ་སྟེ། །ལྷ་རྒྱལ་བླ་མ་ཡེ་ཤེས་འོད། །འཇམ་དཔལ་སྤྲུལ་པར་གྲགས་པ་ནི། །དེ་ནི་རྩ་རྒྱུད་ཆེན་པོ་ལས། །ལུང་བསྟན་ཐོབ་པ་ཐོ་ལིང་གི །དཔལ་མེད་ལྷུན་གྲུབ་གཙུག་ལག་ཁང༌། །བཞེངས་ནས་རྒྱ་གར་ཤར་ཕྱོགས་ནས། །མཁས་བཙུན་སྙན་པའི་འབྲུག་སྒྲ་ཅན། །གྲགས་པའི་རྒྱལ་མཚན་མཐོན་པོ་ཡིས། །ཀུན་ལ་གསལ་བར་གྱུར་པ་ཡི། །དྷརྨ་པཱ་ལ་ཞེས་བྱ་བ། །ཡེ་ཤེས་འོད་ཀྱིས་སྤྱན་དྲངས་ནས། །ཐུགས་རྗེའི་ཉི་མས་རྒྱུད་བསྐུལ་ཏེ། །བསྟན་པ་རིན་ཆེན་གནས་བྱའི་ཕྱིར། །མཁན་པོ་མཛད་ནས་སྒྲུབ་བརྒྱུད་སྤེལ། །དེ་ཡི་མཁན་བུ་གཙོ་བོ་གསུམ། །དགེ་སློང་སཱ་དྷུ་པཱ་ལ་དང༌། །ཇོ་བོ་གུ་ཎ་པཱ་ལ་དང༌། །དགེ་སློང་པྲཛྙཱ་པཱ་ལའོ། །པྲ་ཛྙཱ་པཱ་ལའི་མཁན་བུ་ནི། །ཞང་ཞུང་ཡུལ་གྱི་འདུལ་བ་འཛིན། །ཚུལ་ཁྲིམས་གཡག་གི་རྔ་མ་དང༌། །མིག་གི་འབྲས་བུ་བཞིན་དུ་བསྲུང༌། །ཡོན་ཏན་རིན་ཆེན་ཐམས་ཅད་ཀྱི། །རྒྱུར་གྱུར་འདུལ་བའི་སྡེ་སྣོད་ལ། །མང་དུ་ཐོས་ཤིང་ངེས་བྱས་པས། །སྙན་པས་ནམ་མཁའ་ས་སྟེང་ཁྱབ། །ཐུགས་རྗེའི་སྤྲིན་ལས་ཆོས་ཆར་ཕབ། །རབ་བྱུང་ཐ་བའི་རྒྱུད་སྦངས་ནས། །