[A:1173]
དུམ་བུ་བཅུ་བཞི་པ། ཐུགས་རྗེ་ཆེན་པོའི་སྐོར་དང་རྡོ་རྗེ་ཕྲེང་བ་སོགས་ཀྱི་སྐབས།
ཐུགས་རྗེ་ཆེན་པོ་དཔལ་མོ་ལུགས་ཀྱི་བརྒྱུད་པའི་སྐབས།
རྒྱའི་ཡུལ་ནི་བྱང་ཆུབ་སེམས་དཔའ་འཇམ་པའི་དབྱངས་ཀྱིས་གཟུང་བ་བཞིན་དུ། བོད་ཀྱི་ཡུལ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་རྗེས་སུ་བསྐྱངས་པ་ཡིན་ཏེ། དེའི་བྱིན་གྱིས་རླབས་ཀྱིས་བུ་ཆུང་ཡན་ཆོད། སྐྱེས་པ་དང་བུད་མེད། རབ་ཏུ་བྱུང་བ་དང་བཅས་པ་ཐམས་ཅད་ཀྱི་ཁ་ནས་མ་ཎིའི་སྒྲ་རང་གྲག་པ་འདི་ཡིན་ནོ། དེ་བས་ན་འདོད་པའི་ལྷ་ལ་གསོལ་བ་བཏབ་པས་བྱིན་རླབས་བྱུང་བ་ཡང་སྤྱན་རས་གཟིགས་ཉིད་ལ་བརྟེན་ན་མྱུར་ལ། སྤྱན་རས་གཟིགས་ཉིད་རྒྱལ་པོའི་ཆ་བྱད་དུ་སྤྲུལ་པའི་སྲོང་བཙན་སྒམ་པོས་བསྒྲུབས་པའི་ལྷ་དང་གཙུག་ལག་ཁང་རྣམས་ཀྱང་བོད་ཀྱིས་མཆོད་པར་བྱ་བའི་སྙིང་པོ་ཡིན་ཞིང༌། རྒྱལ་པོ་བཞུགས་པའི་ཕོ་བྲང་བྱུང་བའི་རི་ལ་ཡང་པོ་ཏ་ལ་ཞེས་མིང་དུ་ཆགས་སོ། རྒྱལ་པོའི་གསུང་ལས་བྱུང་བའི་སྔགས་ཀྱི་གདམས་པ་ལ་བརྟེན་ནས་