[A:1185]ལོངས་སྤྱོད་ཇི་ལྟ་བུ་དང་ལྡན་པ་སོགས་ནི་གཞན་དུ་ཤེས་པར་བྱ་ཞིང༌། །རབ་ཏུ་བྱུང་ནས་ཇི་སྲིད་འཚོའི་བར་དུ་སྤྱིར་ཚུལ་ཁྲིམས་དང་ལྡན་པ་རྣམས་ཀྱི་གཙོ་བོ་ཡིན། ཁྱད་པར་དུ་སྟན་གཅིག་དང་རྡོར་དཀར་གྱི་དམ་བཅའ་བ་སྐུ་བགྲེས་པ་ལ་སོགས་པའི་སྙད་ཅི་ཡང་མེད་པར་སྐུ་ཚེ་དང་འགྲོགས། མཁས་པའི་ཡོན་ཏན་ཉ་དཔོན་པོ་ཀུན་དགའ་དཔལ་ལ་སོགས་པའི་མཁས་པ་མང་པོ་བསྟེན་ནས་དམ་པའི་ཆོས་འདུལ་བ་གཞིར་གཟུང་བའི་མཚན་ཉིད་ཀྱི་སྡེ་སྣོད་དང༌། དཔལ་དུས་ཀྱི་འཁོར་ལོས་གཙོ་བྱས་པའི་གསང་སྔགས་ཀྱི་ཕྱོགས་ལ་མཁས་པའི་ཕུལ་དུ་ཕྱིན། རྩོད་པ་ན་མཁས་པ་ཆེན་པོ་གཡག་ཕྲུག་སངས་རྒྱས་དཔལ་ལ་སོགས་པས་ཀྱང་མི་བཟློགས། ཡི་དམ་དུ་མའི་ཞལ་གཟིགས། ཡན་ལག་དྲུག་ལ་སོགས་པའི་རྫོགས་པའི་རིམ་པའི་ཏིང་ངེ་འཛིན་ལ་མངའ་བརྙེས་པས་ཆོས་རྗེ་ཕྱོགས་ལས་རྣམ་པར་རྒྱལ་བའི་སློབ་མའི་གཙོ་བོར་གྱུར། དགུང་ལོ་བརྒྱད་ཅུ་ལྷག་ཙམ་ན་འཆི་ལྟས་ཀྱི་རྣམ་པ་བྱུང་བ་ལ་རླུང་སྦྱོར་ཟླ་བ་གཅིག་མཛད་པས་ལེགས་པར་སྐུ་ཚེ་བསྲིངས་ཏེ་འཁྲུངས་ལོ་ལྕགས་མོ་སྦྲུལ། དགུ་བཅུ་རྩ་གསུམ་པ་ཆུ་མོ་གླང་གི་ལོ་ལ་མཉེལ་བ་མེད་པར་གཤེགས། བུ་སློབ་ཀྱང་ཆོས་རྗེ་དེ་བཞིན་གཤེགས་པ་དང་མཐོང་བ་དོན་ལྡན་དང་བཅས་པའི་འདྲེན་བ་མཛད། སྨྲ་བའི་སེང་གེ་རོང་སྟོན་ལ་སོགས་པའི་མཁས་པ་དཔག་ཏུ་མེད་པ་ཡང་མེ་ཏོག་ལ་བུང་བ་བཞིན་དུ་འདུ། འཕྲལ་གྱི་ལོངས་སྤྱོད་ནི་རྣམ་ཐོས་ཀྱི་བུས་ཇི་ལྟར་བཞེད་པ་བཞིན་དུ་སྒྲུབ། དབང་གྲགས་པ་རྒྱལ་མཚན་ལ་སོགས་པའི་ཆེ་དགུ་