[A:1186]ཐམས་ཅད་ཀྱིས་ནི་ཞབས་སྤྱི་བོར་ལེན། གྲུབ་པའི་དབང་ཕྱུག་དཔལ་ནགས་ཀྱི་རིན་ཆེན་ཡང་བོད་ན་རྣལ་འབྱོར་པ་འདི་ཁོ་ན་བཟང་ཞེས་གསུང༌། དེ་ལྟ་བུའི་དགེ་བའི་བཤེས་གཉེན་ཆེན་པོ་དེས་འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་གཞུང་ཕྱག་ལེན་རྣམས་དེས་འཕགས་པའི་གནས་བརྟན་ཆེན་པོ་བསོད་ནམས་དར་ལ་གནང༌། དེས་ཀྱང་དགེ་སློང་གི་བསླབ་པ་རྣམ་པར་དག་པ་ལ་གནས། སེམས་བྱང་ཆུབ་ཀྱི་མཆོག་ཏུ་བསྐྱེད། འདོད་པ་ཆུང་བ་དང་ཆོག་ཤེས་པ་རྣམས་ཀྱི་གཙོ་བོ་བྱས། འཕགས་པ་སྤྱན་རས་གཟིགས་ཀྱི་སྒྲུབ་པ་ལ་རྒྱུན་དུ་གནས་པས། དེའི་རྗེས་སུ་འབྲང་བའི་རབ་ཏུ་བྱུང་བ་ཡང་མང་དུ་བྱུང་བས་དིང་སང་དབུས་འཕགས་དང་གཙང་འཕགས་ཤེས་བྱ་བའི་སྡེ་གཉིས་སུ་ཆགས། བཅོ་ལྔ་ཙམ་དང་བཅུ་རེ་ཙམ་དང༌། མཐའ་ང་ལྔ་རེ་ཙམ་འདུས་པའི་སྡེ་ཕྲན་གྱིས་ནི་དྭགས་ཀོང༌། དབུས་གཡོར། ལ་སྟོད་ལྷོ་བྱང་ཐམས་ཅད་དུ་ཁྱབ་སྣང་བས་བསྟན་པ་ལ་ཕན་ཤིན་ཏུ་ཆེའོ། ཐུགས་རྗེ་ཆེན་པོ་དཔལ་མོ་ལུགས་ཀྱི་བརྒྱུད་པའི་སྐབས་སོ།
དོན་ཞགས་དམར་ཁྲིད་ཟླ་རྒྱལ་ལུགས་ཀྱི་སྐབས།
ཡང་འཕགས་པ་དོན་ཡོད་ཞགས་པའི་སྒྲུབ་པའི་བརྒྱུད་པ་ནི། པཎྜི་ཏ་ཨེ་ར་པ་ཏི་ཞེས་བྱ་བ་རྒྱ་གར་ལྷོ་ཕྱོགས་པ་ཡིན་པ་ཞིག རྒྱ་གར་ལྷོ་ཕྱོགས་ན་དད་པའི་སྟོབས་ཀྱི་གཙུག་ལག་ཁང་ཞེས་བྱ་བ་ཞིག་ཡོད་པར་ཕྱིན་ནས། རབ་ཏུ་བྱུང་ནས་རིག་པའི་གནས་མཐའ་དག་མཁྱེན་པའི་པཎྜི་ཏ་ཆེན་པོར་གྱུར་