[A:117]ལྟར་ན་དྷརྨ་པཱ་ལ་དང༌། པྲེ་ཏ་ཀ་ལག་ལེན་གྱི་བརྒྱུད་པར་སྣང་ཞིང༌། སུ་བྷཱུ་ཏི་ཤྲི་ཤཱནྟི་ལ་སོགས་པ་རྣམས་བཤད་པའི་བརྒྱུད་པའོ། །འདུལ་བ་འཛིན་པའི་ལོ་རྒྱུས་ཀྱི་སྐབས་སོ།། །།
རྒྱལ་ལྷ་ཁང་གི་སྐབས།
ཀླུ་མེས་ཀྱི་ཀ་བ་བཞིར་གྲགས་པ་ལས། རྒྱལ་ལྷ་ཁང་མ་གཏོགས་གཞན་གསུམ་གྱི་མཁན་རབས་ཀྱི་ཡི་གེ་མ་རྙེད། རྒྱལ་ལྷ་ཁང་འདི་བྱམས་པའི་སྤྲུལ་པར་གྲགས་པའི་སྣ་ནམ་རྡོ་རྗེ་དབང་ཕྱུག་གིས་བཏབ་པ་ཡིན་ཏེ། དེ་ལ་སྣ་ནམ་རྡོ་རྗེ་དབང་ཕྱུག་ནི། ཡབ་སྣ་ནམ་ཇོ་སྲས། ཡུམ་ཞང་ལྕམ་སྒྲོལ་མའི་སྲས་སུ་མེ་ཕོ་བྱི་བ་ལ་ཉམས་དགའ་བར་འཁྲུངས། ཁོང་གིས་ལོ་གསུམ་བཞེས་པ་ས་ཕོ་སྟག་ལ་འདུལ་བའི་བསྟན་པ་ཁམས་ནས་དབུས་སུ་བྱུང༌། རང་ལོ་བཅོ་བརྒྱད་པ་ཆུ་མོ་སྦྲུལ་ལ་ར་བ་ཟླུམ་པོ་ཞེས་བྱ་བའི་གནས་སུ་ཀླུ་མེས་ལ་རབ་ཏུ་བྱུང༌། ལོ་དེ་གླང་དར་མའི་ལྕགས་མོ་བྱ་ནས་དགུ་བཅུ་རྩ་གསུམ་པ་ཡིན། དེ་རྗེས་ལ་དང་པོར་ཚག་གི་གཙུག་ལག་ཁང་བཞེངས། ཕྱིས་སོ་བདུན་བཞེས་པ་ཆུ་ཕོ་བྱི་བའི་ལོ་ལ་རྒྱལ་ལུགས་ལྷས་ཀྱི་གཙུག་ལག་ཁང་བཞེངས། ལོ་འདི་ལ་རྗེ་མར་པ་འཁྲུངས་པ་ཡིན། རང་ལོ་བརྒྱད་ཅུ་རྩ་ལྔ་པ་ལྕགས་ཕོ་བྱི་བ་ལ་གཤེགས། ཁོང་གིས་རྒྱ་གར་དུ་འདུལ་བའི་བཤད་པ་ཚོལ་དུ་བྱོན། རྡོ་རྗེ་གདན་པ་དང་མཇལ། རྡོ་རྗེ་གདན་པས་