[A:1240]ཙཱ་སློབ་པའི་ཕྱིར་ལྷོ་བལ་དུ་འགྲོ་བའི་ལམ་དུ་སྐྱི་རོང་དུ་བཞུགས་པ་ན། རིན་པོ་ཆེ་རྒྱལ་ཚའི་སློབ་མ་དོན་ཞགས་པ་ཆེན་པོ་ཞེས་བྱ་བ་ཞིག་ཡོད་པ་དེ་ལ་དར་ཡུག་ཕྱེད་དང་གཉིས་ཕུལ་ནས། བདག་གིས་ལྷོ་བལ་དང་རྒྱ་གར་དུ་ཕྱིན་ན་བར་ཆད་དུ་མི་འགྱུར་རམ། འགྲོ་བ་ལ་ཕན་ཐོགས་སམ། དགེ་བའི་བསམ་པ་འདྲ་བདོག་པས་འགྲུབ་བམ་གསུམ་པོ་འདི་རྟོག་པ་ཞུས་པས། ཁོང་ན་རེ། དོན་སྣ་གསུམ་ག་ཨེ་ཡོང་མི་ཤེས་ཏེ། ཅིག་འཕགས་པ་ལ་བརྟེན་ནས་བརྟག་གོ་གསུང༌། ལོ་ཙཱ་བ་རང་གིས་ཀྱང་མཆོད་པ་ཆེན་པོ་བཤམས་ནས་རྨི་ལམ་བརྟགས་པས་ནམ་ནངས་སུ་ཉེ་བ་ན་ཨ་ཙ་ར་དུང་སོ་འཁོར་ཅན་ཅིག་བྱུང་ནས། རྨང་ཕྲག་ནས་དུང་གི་སེང་གེ་ཅིག་གཏད་བྱུང་བས་ཅི་ཡིན་བྱས་པས་རྒྱབ་ཡིག་ལྟོས་ཟེར་བལྟས་པས། །དྭི་བྷཱ་ཥི་བྱ་བ་འདུག་བྱང་ཆུབ་ཀྱི་ཤིང་ལོ་གཅིག་བྱུང་དེ་ལ་པཎྜི་ཏ་བྱའི་གདོང་པ་ཅན་ཅིག་འདུག རྒྱབ་ཡིག་ལ་མ་ཧཱ་མཻ་ཏྲི་བྱ་བ་འདུག ཡང་ཤེལ་གྱི་མེ་ལོང་ཅིག་གཏད་བྱུང་བ་ལ་པཎྜི་ཏ་ལྷ་འདྲ་བ་རྒྱབ་ཡིག་ལ་མཉྫུ་ཤྲཱི་བྱ་བ་འདུག ཕྱི་རེ་བ། ནང་ཟབ་ཆེན་ལ་བྱས་པའི་མི་གཟུགས་དཀར་པོ་ཅིག་གི་རྒྱབ་ཡིག་ལ་མ་ཎི་པདྨེ་བྱ་བ་འདུག བཞི་པོ་སྙིང་དུ་སྡུག་པར་འདུག་པས་མཆོད་ཁང་དུ་བཞག་མཉམ་ནས་ཁྱེར་ཕྱིན་པས། ཨ་ཙ་ར་ན་རེ། ཚུར་ཐོང་གོ་རིམ་བསྒྱུར་དགོས་ཟེར་ནས་དུང་གི་སེང་གེར་གར་འགྲོར་རྒྱུག་ཆུག དེ་ནས་ཤིང་ལོ་དང་མེ་ལོང་ཞོག་ལ་ཟབ་ཆེན་གྱི་མི་གཟུགས་ཁྱེར་ཅིག དེ་ནས་མེ་ལོང་ཁྱེར་ཅིག དེའི་རྗེས་ལ་ཤིང་ལོ་ཁྱེར་ཅིག་ཟེར། མནལ་སད་པ་དང་བཟང་བར་ནི་