[A:1239]དེའི་མཐའ་ནི་ས་མོ་སྦྲུལ་ཡིན། དེ་པཎ་ཆེན་གྱི་ཉི་ཤུ་རྩ་གསུམ་པའོ། ཞེས་བྱ་བ་འདི་ཤིན་ཏུ་གསལ་བས་ན། ཉི་ཤུ་རྩ་ལྔ་པ་ལྕགས་མོ་ལུག་ཅེས་བྱ་བར་ཐེ་ཚོམ་མེད་དོ། འདི་ལ་སྤྱི་བོ་ལྷས་པ་ལ་སོགས་པའི་ཡི་གེར་པཎ་ཆེན་བོད་དུ་རང་ལོ་དྲུག་ཅུ་རྩ་ལྔ་པ་ལ་ཕེབས་སོ་ཞེས་ཟེར་བ་ཡང་ནོར་བའོ། བོད་དུ་ཕེབས་པའི་ལོ་ནི་ཤིང་ཕོ་བྱི་བ་ཡིན་པར་ལོ་ཙཱ་བས་གསུངས་པས། ཤིང་ཕོ་བྱི་བ་ནི་རང་ལོ་བདུན་ཅུ་བརྒྱད་པའོ། དེ་ནས་ཆུ་མོ་བྱའི་བར་དུ་ལོ་བཅུ་བཞུགས་ནས་ཤིང་ཕོ་ཁྱི་ལ་བོད་ནས་ཐེགས། དེ་ནས་ལོ་སྐོར་འཁོར་བའི་ཤིང་མོ་བྱའི་ལོ་ལ་ལོ་དགུ་བཅུ་རྩ་དགུ་ལོན། དེའི་སྒྲོག་ཟླའི་ཚེས་ལྔ་གཟའ་སྤེན་པ་ཡོད་པ་ལ་ཡོངས་སུ་མྱ་ངན་ལས་འདས་པར་ཡང༌། གཅིག་གིས་མ་ཚང་ལོ་བརྒྱའི་དུས། །བྱ་ལོ་སྒྲོག་ཟླའི་དཀར་ཕྱོགས་ཀྱི། །སྤེན་པའི་ཉི་མའི་ཚེས་ལྔ་ལ། །འགྲོ་བའི་ཉི་མ་ནུབ་པར་བསྟན། །ཞེས་འབྱུང་བའི་སྤེན་པའི་ཉི་མ་ཡང་པཎ་ཆེན་ཉིད་ཀྱིས་མཛད་པའི་ལྔ་བསྡུས་ཀྱི་རྩིས་གཞུང་གིས་བརྩིས་ན་གསལ་པོར་འཆར་རོ། དོན་དུ་ན་པཎ་ཆེན་ཉིད་མེ་མོ་ལུག་ལ་འཁྲུངས། ས་མོ་སྦྲུལ་ལོ་ཉི་ཤུ་རྩ་གསུམ་པ་ལ་རབ་ཏུ་བྱུང༌། བདུན་ཅུ་རྩ་བརྒྱད་པ་ཤིང་ཕོ་བྱི་བ་ལ་བོད་དུ་ཕེབས། ཆུ་མོ་བྱའི་བར་ལོ་བཅུ་བཞུགས། ཤིང་ཕོ་ཁྱི་ལ་བོད་ནས་བྱོན་ཏེ་ཁ་ཆེར་གཞན་དོན་རྒྱ་ཆེན་པོ་མཛད་ནས་རང་ལོ་དགུ་ཅུ་རྩ་དགུ་པ་ཤིང་མོ་བྱ་ལ་ཞི་བར་གཤེགས་སོ། ཞེས་བྱའོ། བོད་དུ་ཇི་ལྟར་སྤྱན་དྲངས་ཤིང་ཕེབས་ནས་འགྲོ་དོན་ཇི་ལྟར་མཛད་པའི་རིམ་པ་ནི། ཁྲོ་ཕུ་ལོ་ཙཱ་བ་ཞེས་བྱ་བའི་སྐྱེས་བུ་དམ་པ་དེས་ལོ་