[A:139]ནོ། །བདུད་རྩི་ནི་སློབ་དཔོན་བི་མ་ལ་མི་ཏྲས་བོད་དུ་གསུངས་ཤིང༌། དེ་ནས་བརྒྱུད་དོ། །དེ་ལྟར་ན་རྙིང་མ་བ་རྣམས་ཀྱིས་ཉམས་སུ་སྤྱོད་པའི་སྒྲུབ་པ་བཀའ་བརྒྱད་ནི། འཇམ་དཔལ་སྐུ། པདྨ་གསུང༌། ཡང་དག་ཐུགས། བདུད་རྩི་ཡོན་ཏན། ཕུར་པ་ཕྲིན་ལས་ཞེས་འཇིག་རྟེན་ལས་འདས་པའི་སྡེ་ལྔ་དང༌། མ་མོ་རྦོད་གཏོང་དང༌། དམོད་པ་དྲག་སྔགས་དང༌། འཇིག་རྟེན་མཆོད་བསྟོད་དེ། དེ་ལྟར་སྡེ་བརྒྱད་དོ། །དེ་ལ་འཇམ་དཔལ་སྐུ་ནི་རྣམ་སྣང༌། པདྨ་གསུང་ནི་འོད་དཔག་མེད། ཡང་དག་ཐུགས་ནི་མི་བསྐྱོད་པ། བདུད་རྩི་ཡོན་ཏན་ནི་རིན་འབྱུང༌། ཕུར་པ་ཕྲིན་ལས་ནི་དོན་གྲུབ་སྟེ་རིགས་ལྔར་བསྡུས་པ་ཡིན་ལ། མ་མོ་ལ་སོགས་པ་འཇིག་རྟེན་པའི་རིགས་ཀྱི་སྡེ་གསུམ་ནི། སློབ་དཔོན་པདྨས་བོད་ཀྱི་ལྷ་སྲིན་རྣམས་བཏུལ་ཞིང་དམ་ལ་བཏགས་ནས་སྡེ་གསུམ་དུ་ཕྱེ་བ་ཡིན་པས། བོད་མའོ་ཞེས་རྙིང་མ་བ་རྣམས་ཀྱི་ཡི་གེ་འགའ་ཞིག་ལས་འབྱུང་སྟེ། འཐད་པར་ཡང་བསམས་སོ། དེ་ཡང་འཇིག་རྟེན་མཆོད་བསྟོད་ཀྱི་དཀྱིལ་འཁོར་ན་ཤམྦུ་ལ་སོགས་པའི་བོད་ཀྱི་ལྷ་ཆེན་པོ་དག་ཡོད་དེ། ལྷ་ཆེན་པོ་འདི་རྣམས་ཀྱང་སངས་རྒྱས་མཐོང་བ། རང་རང་གི་གསང་སྔགས་ཀྱི་དམ་ཚིག་དང་བཅས་ཤིང༌། དེས་འཇིག་རྟེན་ལ་ཕན་ཐོགས་པ་ཤ་སྟག་ཡིན་པས། དཔལ་འཛིན་གྱིས། འཇིག་རྟེན་མཆོད་བསྟོད་དཀྱིལ་འཁོར་དུ། །བོད་ཀྱི་ལྷ་འདྲེ་འཛུད་ལུགས་ཀྱིས། །གཞན་ན་འབྱུང་པོ་ཟད་དམ་ཅི། ཞེས་ཁ་སྨྲ་བ་ནི་ལོག་པའི་གཏམ་སྟེ། གཟུངས་གྲྭ་ལྔར་ཡུལ་སོ་སོའི་གནོད་སྦྱིན་མང་དུ་