[A:144]དང་ཆོག་ཡིག་ལ་སོགས་པར་སྡེབས་ནས། འབངས་རྩེ་མོ་བཞི་རྩེ་ལྐོག་དང་ལྔ། སྒོམ་ཆེན་བརྒྱ་རྩེ་བརྒྱད་ལ་སོགས་པ་ལ་བཤད་དོ། །དེ་ལ་རྩེ་མོ་བཞི་ནི། །ལྟ་དགོངས་ཀྱི་རྩེ་མོར་གྱུར་པ་ཟུར་ཆུང་ཤེས་རབ་གྲགས་པ། སྒྱུ་འཕྲུལ་གྱི་བཤད་པ་ཕྱོགས་གཅིག་གི་རྩེ་མོར་གྱུར་པ་བན་ནམ་བྲེས་ཀྱི་མི་ཉག་འབྱུང་གྲགས། མཁྱེན་རྒྱའི་རྩེ་མོར་གྱུར་པ་ར་ཟའི་ཞང་འགོས་ཆུང་བ། སྒོམ་སྒྲུབ་ཀྱི་རྩེ་མོར་གྱུར་པ་འཚོ་ཉའི་བཟང་སྒོམ་ཤེས་རབ་རྒྱལ་པོའོ། །རྩེ་ལྐོག་ནི། ཆོས་ཀྱི་སྟེང་དུ་ཕོ་ཟའི་རྩེ་མོར་གྱུར་པ་རྩགས་བླ་མའོ། །ཡང་ན་རྩེ་ལྐོག་བརྒྱད་དེ། ལོ་རོག་དང། ལ་ཐུང་ཤཱཀ་རྒྱལ་དང༌། རྟ་རོག་དང༌། རྩགས་བླ་མ་དང༌། སུམ་པ་དབང་ཚུལ་དང༌། འོལ་སྒོམ་དང༌། ཡུམ་པ་བློ་རྒྱ་དང༌། ཆགས་སྟོན་ནམ་མཁའ་སོགས་སློབ་མའི་ཚོགས་ཤིན་ཏུ་མང་བ་ལ་བཤད་པ་རྒྱ་ཆེར་མཛད། འུག་པ་ལུང་གི་གཙུག་ལག་ཁང་ལེགས་པར་བཞེངས། ཤངས་ཀྱི་མདར་སྲམ་པ་སྒྲུབ་ཁང་དུ་དཔལ་ཆེན་པོ་ལྷ་དགུ་ལྡེ་གུར་བཞེངས། དེའི་ཚེ་གནས་དེ་ནས་ཡ་ཟད་ཕྱིན་པ་ན། འོག་གདོང་གི་བྲག་ལ་གནས་འཆའ་བའི་ཀླུ་ཞིག་ཡོད་པ་དེ་གཟུང་ནས་རྫ་མར་བཅུག་སྟེ་ཁ་སྐྱི་མས་བཅད་དེ་རྒྱ་བཏབ་ནས་བཞག་པས། ཀླུ་དེས་ཕྱོགས་ཕྱོགས་ཀྱི་ཆང་རྣམས་བསྡུས་ནས་ལས་བྱེད་པ་དང༌། རབ་ཏུ་གནས་པའི་སྐབས། ཐམས་ཅད་དུ་རྫ་མ་གཅིག་ལས་ཆང་ཟད་མི་ཤེས་པ་བྱུང༌། རབ་ཏུ་གནས་པའི་ཚེ་གྲོང་པའི་ཕྱུགས་མང་པོ་གཡར་ནས་བསད་དེ། རབ་ཏུ་གནས་པའི་ཤ་སྟོན་ཆེན་པོ་བྱས། ཉིན་མོའི་མཇུག་ཏུ་ཕྱུགས་