[A:143]ཟུར་པོ་ཆེ། ལྷ་རྗེ་སྨན་པ། སྒོམ་ཆེན་ཤཱ་སྡེ། སྒོམ་ཆེན་རྡོར་འབྱུང་ངོ༌། །ཟུར་པོ་ཆེ་ཚངས་པར་སྤྱོད་པས་སྲས་མེད། ལྷ་རྗེ་སྨན་པ་ལ་ཡང་སྲས་མ་བྱུང༌། སྒོམ་ཆེན་ཤཱག་སྡེའི་སྲས་ཨ་མི་ཤེས་རབ་བཟང་པོ། དེའི་སྲས་ཨ་མི་ཤེར་བློ། དེ་ལ་སྲས་བཞི། ལྷ་རྗེ་ཟུར་དཔལ། ཁམས་པ། དབང་ངེ༌། ཇོ་མགོན་ནོ། །དབང་ངེ་ལ་སྲས་གཉིས། ཨ་མི་ཧེ་རུ་དང༌། དབང་མགོན་ནོ། །ཨ་མི་ཧེ་རུའི་སྲས་ཟུར་འོད་པོ། དེ་ལ་སྲས་གཉིས། ཤཱཀ་མགོན་དང༌། ཤཱཀ་འོད་དོ། །སྒོམ་ཆེན་རྡོར་འབྱུང་གི་སྲས་ཇོ་བཙུན་རྡོ་རྗེ་འབར། དེའི་སྲས་ཟུར་ནག་འཁོར་ལོ། །དེ་ལ་སྲས་གཉིས། ལྷ་རྗེ་ཀུན་དགའ་དང༌། ཇོ་རྩེ་འོ། །ཀུན་དགའི་སྲས་རྒྱལ་པོ། ཇོ་རྩེའི་སྲས་འབེར་རེ་ལགས་སོ། །ལྷ་རྗེ་ཟུར་པོ་ཆེ་ཤཱཀྱ་འབྱུང་གནས་སྤྱིར་བླ་མ་མང་པོ་ལ་ཐུག་ཀྱང༌། ཁྱད་པར་དུ་ཆོས་ལུང་གི་མྱང་ཡེ་ཤེས་འབྱུང་གནས་ལ་སྒྱུ་འཕྲུལ་དང་སེམས་ཕྱོགས་ཞུས། དགེ་གོང་གི་ལྕེ་ཤཱཀྱ་མཆོག་ལ་བདུད་རྩི་ཞུས། ཡུལ་གསར་གྱི་གཉན་ནག་དབང་གྲགས་ལ་གསང་དབང་དང་ཐབས་ལམ་ཞུས། ཐོ་དཀར་ནམ་མཁའ་ལྡེབ་ལ་མདོ་དང་བར་ཁབ་ཞུས། མྱང་སྟོད་ཀྱི་འབྲེ་ཁྲོ་ཆུང་ལ་ཀ་དག་དང་ལྷུན་གྲུབ་ཀྱི་བཤད་པ་དང་ལམ་རིམ་ཆེན་མོ་ལ་སོགས་པ་ཞུས། བསམ་ཡས་འཆིམས་ཕུའི་རོག་ཤཱཀྱ་འབྱུང་གནས་ལ་ཡང་དག་ཞུས་སོ། །དེ་ལ་སོགས་པའི་མཁས་པ་མང་པོ་ལ་ཐུག་ནས། རྩ་རྒྱུད་དང་བཤད་རྒྱུད་དུ་ཕྱེ། རྩ་བ་དང་འགྲེལ་པར་སྡེབས། རྒྱུད་དང་སྒྲུབ་ཐབས་སུ་སྡེབས། སྒྲུབ་ཐབས་