[A:150]ཆོས་ཀྱི་དོན་ལ་བློ་གྲོས་ཀྱི་སྤོབས་པ་མཆོག་དང་ལྡན་པ་ལགས་སོ། དེ་ཡང་གཡས་རུ་ཁང་ཁྲིའི་ལྷ་ཁང་ན་འཆད་ཉན་སྐྱོང་བའི་དུས་སུ། གྲྭ་པ་རྣམས་གོ་མ་ཆོད་མི་གསུམ་ལ་གཏད་ནས། ཁྱེད་ཚོས་འཆད་ཉན་གྱི་བསྟན་པ་སྐྱོངས་ཤིག ང་སྒོམ་སྒྲུབ་ལ་འགྲོ་གསུངས་ནས་བྲག་རྒྱ་བོ་ལ་གཤེགས་ཏེ། བྲག་རྒྱ་བོ་དེ་བཅོམ་ལྡན་འདས་དཔལ་ཆེན་པོ་ལ་གཽ་རཱི་མ་བརྒྱད་ཀྱིས་བསྐོར་བ་འདྲ་བ་ཡིན་པས། འདི་ལ་སྒྲུབ་པ་བྱས་ན་བྱིན་རླབས་ཆེ་བ། སྒྲུབ་ཐག་ཉེ་བ་འོང་གསུང་ནས། མིང་ལ་བྲག་རྒྱ་བོ་དགུ་འདུས་ཞེས་ཟེར་ལ། དེར་བྱོན་ནས་སྒྲུབ་པ་མཛད་པས་དང་པོ་ཆོ་འཕྲུལ་ཤིན་ཏུ་ཆེ་བར་བྱུང་སྟེ། ས་ཕྱོགས་ཐམས་ཅད་སྡིག་པས་ཁེངས་ཀྱི་བྱུང་བ་དང་སྡིག་པ་རྩིད་བུ་ཙམ་ཡང་བྱུང༌། ནུབ་གཅིག་གི་མནལ་ལམ་ན། བྲག་རྒྱ་བོའི་རྩེ་མོར་མི་ནག་པོ་ཆེན་པོ་ཅིག་བྱུང་ནས། ལྷ་རྗེའི་ཞབས་གཉིས་ནས་བསྡུས་ཏེ་ཀླད་ལ་བསྐོར་ནས་བསྐྱུར་བས། བྲག་གི་མདུན་དུ་ཐང་ཆེན་པོ་ཅིག་ཡོད་པའི་དཀྱིལ་དུ་བརྡབས་པ་ཅིག་རྨིས། མནལ་ཕྲས་དེ་སད་ཙ་ན། ཐང་དཀྱིལ་ན་དངོས་སུ་འདུག་སྐད། ཡང་ཡར་ལ་འཛེགས་ཏེ་དེ་འདྲ་བའི་ཆོ་འཕྲུལ་ཆེན་པོ་ཀུན་ལ་མ་འཛེམ་པར་བཞུགས་ནས་སྒྲུབ་པ་མཛད་དོ། །དེ་ཡང་དང་པོ་རྡོ་རྗེ་སེམས་དཔའི་ཁང་བུ་བྱ་བར། གསང་བ་སྒྱུ་འཕྲུལ་ལས་བྱུང་བའི་ཕྱག་རྒྱ་བསམ་གཏན་གྱི་སྒྲུབ་པ་བྱ་བ་རྡོ་རྗེ་སེམས་དཔའི་སྒྲུབ་ཐབས་ཤིག་ལ་ཕྱག་ལེན་མཛད་ནས་བསྒྲུབས་པས། རྡོ་རྗེ་སེམས་དཔའི་ཞལ་གཟིགས་ཏེ་ཐག་གི་ལུང་པ་རྡོ་རྗེ་སེམས་དཔས་ཁེངས་པ་བྱུང༌། སྣང་བ་ཟད་པར་གྱི་