[A:151]སྐྱེ་མཆེད་བརྙེས་ཤིང༌། ཅིར་སྣང་ཐམས་ཅད་རྡོ་རྗེ་སེམས་དཔའི་རང་བཞིན་དུ་བཀྲ་ལམ་ལམ་གསལ་བ་བྱུང་བ་ལ། དེ་དག་ཀྱང་བཟང་རྟོག་གི་མཐུ་བརྟས་པ་ཡིན། ཡང་དག་པར་གཏད་པ་ཅི་ཡང་མེད་སྙམ་དུ་དགོངས་ནས། བསམ་གཏན་གྱི་ཁང་བུར་རྫོགས་པ་ཆེན་པོ་རྩོལ་བྲལ་གྱི་ངང་ལ་བཞུགས་པས། རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ཤར་ཏེ། ས་རྡོ་རི་བྲག་ཐམས་ཅད་ལ་ཐོགས་པ་མེད་པར་འགྲོ་བ་བྱུང་ངོ༌། །མཚན་ཉིད་པའི་དགེ་བཤེས་སྦ་དགེ་མཐོང་བྱ་བ་ཞིག་དེའི་དུས་སུ་ཐག་ཏུ་ཆོས་འཁོར་ལ་བྱོན་ནས་ཁོང་གི་གྲྭ་པ་མཁས་པ་ཞིག་ལྷ་རྗེ་ལ་བགྲོ་གླེང་བྱེད་དུ་བྱུང་སྟེ། ཁོས་མདུན་ན་ཀ་བ་ཡོད་པ་དེ་ཆོས་ཅན་དུ་བཞག་ནས། ཀ་བ་ཆོས་ཅན་བྱས་པས། ཀ་བ་ཆོས་ཅན་ཀ་བ་ཆོས་ཅན་ཁྱོད་འཇིག་རྟེན་རང་རྒྱུད་པའི་འཁྲུལ་ངོ་ལ་ཀ་བ་རང་རྒྱུད་དུ་སྣང་ཡང༌། རྫོགས་པ་ཆེན་པོ་རང་སྣང་རིས་མེད་ཀྱི་དོན་ལ་ཀ་བ་གྲུབ་པ་མི་གདའ་གསུང་ནས། ཕྱག་ཡུག་ཡུག་མཛད་པས་ཀ་བ་ལ་ཐོགས་ཆགས་མེད་པར་ཕྱམ་ཕྱམ་གདའ་སྐད། དེར་ཁོ་ངོ་མཚར་སྐྱེས་ནས་སྨྲ་མ་ནུས་པར་དད་པ་ཐོབ་ནས་ལྷ་རྗེའི་སློབ་མ་བྱས་པ་ནི་མ་ཐོག་བྱང་འབར་ཡིན་ནོ་ཡང་ཟེར། དེ་ལྟར་བྲག་རྒྱ་བོ་ལ་ལོ་རིལ་པོ་བཅུ་གསུམ་ཡལ་ཡོལ་གཅིག་དང་བཅུ་བཞི་བཞུགས་པ་ལ། དགོན་པ་ནས་འབྱོན་པའི་རྐྱེན་གཉིས་ལགས་སྐད། གཅིག་ནི་གོ་མ་ཆོད་མི་གསུམ་གྱིས་རྒྱབ་ཚོལ་ཚོལ་ནས་མདུན་ཤོར་ཏེ། འགོ་བྱ་ཚ་ན་རེ། གསང་བ་སྙིང་པོ་འདི་ལ་ཐབས་ལམ་གྱི་སྐབས་སུ་རྒྱབ་ཏུ་མ་རྒྱུད་དགོས་པ་འདུག་ཟེར་ནས། འགོས་ཁུག་