[A:154]པས། སྤོབས་པ་ལན་མེད་པར་གྱུར་ཏོ། །དེའི་རྗེས་ལ་གླན་སྟོན་ཤཱཀ་བཟངས་ཀྱིས་དྲིས་པ། ཁྱེད་གསང་བ་སྒྱུ་འཕྲུལ་པའི་ལུགས་ཀྱིས་སྣང་བ་ཐམས་ཅད་ལྷ་དང་ལྷ་མོའི་དཀྱིལ་འཁོར་དུ་འདོད་པ་མ་ལགས་སམ་ཞུས་པས། ཡུལ་བེམ་པོ་རང་རྒྱུད་དུ་སྣང་བ་མངོན་སུམ་གྱི་ཚད་མ་སུས་འགེགས་གསུང༌། འོ་ན་མི་འདོད་དམ་བྱས་པས། སེམས་ཅན་རྣམས་ཀྱི་མ་དག་པའི་འཁྲུལ་སྣང་རང་རྒྱུད་པ་སྦྱོར་བར་བྱ་བའི་ཆེད་དུ། བཀའ་མདོ་རྒྱུད་དུ་མ་ལས་གསུངས་པ་དང་སུས་འགལ་བར་ནུས་གསུངས་པས། ཡང་ལན་མེད་པར་གྱུར་ཏོ། །དེ་ལྟར་ཁོང་བཞིས་རིམ་གྱིས་དྲིས་པས། ཐམས་ཅད་སྤོབས་པ་ལན་མེད་དུ་གྱུར་ཏེ། དེར་ཁོང་རྣམས་ན་རེ། ཐེག་པ་ཆེན་པོའི་ཆོས་ཕྱིན་ཅི་མ་ལོག་པར་རྟོགས་པ། རིགས་པ་དང་གྲོལ་བའི་སྤོབས་པ་དང་ལྡན་པ་འདི་འདྲ་བའི་བཤེས་གཉེན་གང་ནས་ཀྱང་མི་རྙེད་པས། འོན་ཀྱང་བུ་གཅིག་དངོས་སུ་ཕྱིན་ན་སློབ་དཔོན་མི་དགྱེས་པ་འོང་བས། སང་ཕོད་ཐབས་ཀྱིས་སློབ་དཔོན་དང་བྲལ་ལ་ཟུར་ཆུང་གི་ཞབས་དྲུང་དུ་མི་འདུད་རེ་མནའ་མཐོ་གྱིས་ཟེར་ནས་མནའ་མཐོ་བཅད། དམ་བཅས་ནས་སང་ཕོད་ལྷ་རྗེའི་སྤྱན་སྔར་བྱུང་བས། དེ་རྣམས་ལ་ཀ་བ་བཞི་བྱུང་བ་ཡིན་ནོ། །དེ་ནས་ཁོང་རྣམས་ཚུར་ལོག་ནས་སློབ་དཔོན་གྱི་དྲུང་དུ་ཕྱིན་ཙ་ན། ཁྱེད་ཚོས་ཟུར་ཆུང་བ་སུན་ཕྱིན་ནམ་གསུང༌། སུན་ཕྱིན་པར་མི་གདའ་བྱས་པས། མ་དགྱེས་ཏེ་ཕྲག་དོག་གི་མུན་པས་བཀབ་ནས་ཟུར་ཆུང་ཤེས་རབ་གྲགས་པ་དང་འདྲ་བའི་ལྟ་བ་ངན་པ་ཅན། སྐྱེ་བོ་ཐམས་ཅད་ལོག་པའི་ལམ་ལ་འཁྲིད་པ་