[A:155]འདི་བསད་ན། སངས་རྒྱ་ངེས་ཏེ་ཐེ་ཚོམ་མེད་པར་ཐག་ཆོད། དེ་ཅིའི་ཕྱིར་ན་དོན་དུ་འགྱུར་ན་བཀག་པ་རྣམས་གནང་བའི་ཕྱིར་རོ་གསུང་སྐད། དེ་ལྷ་རྗེའི་གྲྭ་པ་རྣམས་ཀྱིས་ཐོས་ནས། དགེ་བཤེས་ཁྱུང་པོས་ངེད་རང་ལ་འདི་སྐད་གསུང་གི་འདུག་ཟེར་ཞེས་སྙན་དུ་གསོལ་བས། དེའི་ཚེ་ཅང་མི་གསུང་བར་ནང་པར་ཆོས་ཁྲིའི་ཁར་བྱོན་ནས་ཆོས་གསུང་ཁར་བཞད་ཀྱི་འདུག་སྟེ། ཅི་ལ་དགྱེས་ཞུས་པས། ཆོས་བྱ་བའི་ངའི་ཐེག་པ་ཆེན་པོ་གསང་སྔགས་འདི་ཡིན་པར་འདུག སྒྲོལ་བ་ལ་བརྟེན་ནས་སངས་རྒྱ་བར་འདོད་པ་འདི་གསང་སྔགས་ཀྱི་ལུགས་ཡིན། མཚན་ཉིད་པ་ལ་མེད་སྙམ་ཙ་ན། ཟུར་ཆུང་བ་ལྟ་བུ་བསད་ན་སངས་རྒྱས་གསུང་ནས་ཁྱུང་པོ་གྲགས་སེ་ལྟ་བུའི་མཚན་ཉིད་པ་ཆེན་པོ་ཡང་བློ་ཕུགས་ངའི་ཆོས་ལ་གཏོད་པར་འདུག་པས། དེ་དགའ་བ་ཅིག་བྱུང་གསུང་སྐད། དེ་ལ་སེམས་ཕྱོགས་ཀྱི་ཀ་བ་གུང་བུའི་སྐྱོ་སྟོན་ཤཱཀ་ཡེས། མདོའི་ཀ་བ་སྐྱེད་ལུངས་ཀྱི་ཡང་ཁེང་བླ་མ། སྒྱུ་འཕྲུལ་གྱི་ཀ་བ་ཆུ་བར་གྱི་གླན་ཤཱཀྱ་བཟང་པོ། ཕྲིན་སྒྲུབ་ཀྱི་ཀ་བ་ནག་མོ་རིའི་མདའ་ཏི་ཇོ་ཤཱཀ་གོ །མ་ཐོག་བྱང་འབར་དང་བརྒྱུད་པ་ལྔ་ཞེས་ཀྱང་གྲགས། གདུང་བརྒྱད་ནི། མ་ཐོག་པ་དང༌། སྐྱ་སྟོན་ཆོས་སེང༌། གླན་ཤཱཀྱ་བྱང་ཆུབ། རྩགས་ཤཱཀ་རིངས། སྣུབས་སྟོན་བག་མ། དབུས་པ་ས་འཐོར། ཤུ་སྟོན་ཟླ་གྲགས། རྩེ་ཕྲོམ་བྱང་དཔལ་དང་བརྒྱད་དོ། །ཡང་འ་ལ་གཟི་ཆེན། ནལ་རྦ་སྙིང་པོ། རམ་སྟོན་རྒྱལ་བ་གསུམ་བཅུག་པ་ཡང་འདུག་གོ །སྒོམ་ཆེན་མི་གཉིས་ནི། འབའ་སྒོམ་དིག་མ་དང༌།