[A:178]དགོངས་ནས་ནམ་མཁའ་ལྟ་བུ་ལ་ཐུགས་རྗེའི་ཉི་ཟླ་ལྟ་བུར་ཤར་ནས་སྙན་པའི་གྲགས་པས་ཕྱོགས་མཚམས་ཐམས་ཅད་དུ་ཁྱབ་ཅིང༌། གདུལ་བྱའི་ཚོགས་བསམ་གྱི་མི་ཁྱབ་པ་འདུས་ནས་བླ་མའི་ཞབས་ཏོག་དང་འགྲོ་བའི་དོན་རྒྱ་ཆེན་པོ་དཔག་ཏུ་མེད་པ་མཛད་དོ། དེ་ཡང་བླ་མ་མཉེས་པ་གསུམ་གྱིས་མཉེས་པ་མཛད། གུས་པ་གཞུང་བཞིན་དུ་སྐད་ཅིག་ཀྱང་མི་འགལ་བར་མཛད། ངས་བླ་མའི་ཞབས་དྲུང་ནས་འགྲོ་བ་ལ་ཞབས་སྤྱི་བོར་མ་བླངས་པར་འགྲོ་མ་མྱོང་གསུང༌། གསེར་གྱི་རྒྱས་འབྲིང་རྣམ་གསུམ་ལ་སོགས་པ་མདོ་ཚར་བཅུ་བདུན་གྱིས་སྣ་དྲངས་པའི་ཆོས་དང་ཟང་ཟིང་གི་ཞབས་ཏོག་བསམ་གྱིས་མི་ཁྱབ་པ་མཛད། ཐུགས་དགོངས་ཇི་ལྟ་བ་བཞིན་ལོངས། རྟོགས་གྲོལ་དུས་གཅིག་ལ་བྱུང༌། རྫོགས་ཆེན་རང་སྣང་རིས་མེད་ཀྱི་དགོངས་པ་ཤར་ནས་ས་རྡོ་རི་བྲག་ཐམས་ཅད་ལ་ཐོགས་མེད་དུ་འགྲོ་ནུས་པ་བྱུང༌། མི་མ་ཡིན་གྱིས་སྐོར་བ་བྱེད་པ་གཟིགས། མངོན་པར་ཤེས་པ་མངའ་བའི་ལོ་རྒྱུས་མང་དུ་ཡོད། གཟད་ཕུའི་ད་ལུང་དགོན་པར་བཞུགས་པའི་ཚེ་ཕ་ཝོང་ལ་ཐིམ་པ་དང༌། སྲིན་པོ་རིར་གྱང་ལ་ཐོགས་མེད་དུ་གཤེགས་པ་ལ་སོགས་པ་མང་ངོ༌། སྐྱེས་བུ་ཆེན་པོ་འདིས་བྱང་ཕྱོགས་ཀྱི་རྒྱུད་གངས་རིའི་ཁྲོད་འདིར་ཡུལ་ཕྱོགས་ཐམས་ཅད་དུ་བྱོན་ནས། སྐྱེ་དགུ་རྣམས་ཆོས་ལ་བསྒྱུར་ནས་ཐར་པའི་ལམ་ལ་བཀོད། རྗེས་སུ་ཕྲིན་ལས་སྒྲུབ་པའི་དགེ་བའི་བཤེས་གཉེན་བསམ་གྱིས་མི་ཁྱབ་པ་བྱུང་སྟེ། ཉི་ཟླ་ལྟར་གྲགས་པ་ཡིན་ནོ། གཞན་ཡང་བསྟན་པའི་བྱ་བ་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་