[A:179]བཞེངས་པ་དང༌། གསོ་བ་དང་།གཞན་དག་བཞེངས་པ་ལ་ཡོ་བྱད་གཏོང་བ་ལ་སོགས་པ་དཔག་ཏུ་མེད་པ་མཛད། རྒྱ་གར་ནས་བྱོན་པའི་ལོ་པཎ་མཁས་པ་རྣམས་ཀྱི་ཞབས་ཏོག་མཛད། བསྟན་པའི་བདག་པོ་སྔགས་མཚན་ཉིད་ཀྱི་སྡེ་སྣོད་འཛིན་པ་ཆེན་པོ་རྣམས་ཀྱི་ཞབས་ནས་འདེགས། འཇིག་རྟེན་གྱི་བྱ་བ་སྤངས་ནས་སྒོམ་སྒྲུབ་མཛད་པ་དང༌། སེམས་ཅན་དབུལ་ཞིང་ཕོངས་པ་ཀུན་གྱི་སྦྱིན་བདག་མཛད། རྒྱ་གར་དང་རྒྱ་ནག་དང་བལ་པོ་ལ་སོགས་སྐད་རིགས་མི་གཅིག་པའི་སྐྱེ་བོ་ཀུན་ཀྱང་འདུས་ཤིང༌། ཐམས་ཅད་ཀྱི་དགོས་འདོད་འབྱུང་བའི་གནས་སུ་གྱུར་ཏེ། ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོ་ལྟ་བུ་ཡིན་ནོ། གཞན་ཡང་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་རྡོ་རྗེ་ལྟ་བུའི་ཏིང་ངེ་འཛིན་སྐྱེ་བའི་གནས། མེ་བདུན་ཆུ་གཅིག་ལ་སོགས་པས་ཀྱང་གཞིག་པར་མི་ནུས་པའི་གནས། བྱང་ཆུབ་ཀྱི་སྙིང་པོ་རྡོ་རྗེའི་གདན་ལ་མཆོད་པ་ལན་གསུམ་བསྐྱལ། སྟོན་པའི་སྐུ་ཚབ་ལྷ་སའི་ཇོ་བོ་རྣམ་གཉིས་ཀྱི་ཞབས་ཏོག་ལན་བཞི་མཛད། དེ་ལ་སོགས་པའི་འགྲོ་བ་རྣམས་ལ་དངོས་དང་བརྒྱུད་པས་ཕན་གདགས་པའི་ཕྲིན་ལས་དཔག་ཏུ་མེད་པ་མཛད་དེ། བྱང་ཕྱོགས་ཀྱི་རྒྱུད་འདིར་རྩོད་མེད་དུ་གྲགས་པ་ཡིན་ནོ། ལྷ་སའི་རྡོ་རགས་ལན་བཞི་མཛད་པའི་ཕྱི་མ་ལ་གཤེགས་སྐྱེམས་ཀྱི་དུས་སུ། འཁོར་ཚོས་ཆང་འཐབ་བརྒྱབ་པས་ཐུགས་ལོག་སྟེ། ཁྱོད་ཚོ་ངས་སུན་འདུག་སྟེ་ང་ཡང་ཁྱེད་ཚོས་སུན་འདུག་ཅིག ངས་ག་ཤེད་ཅིག་ལ་ཁྱེད་ཚོས་མིག་གིས་མི་མཐོང་རྣ་བས་མི་ཐོས་པ་ཅིག་བྱ་ཡིས་གསུང་སྟེ།