[A:183]དང༌། དགྱེས་རྡོར་མེས་ལུགས་དང༌། འཇམ་དཔལ་གསང་ལྡན་དང༌། བདེ་མཆོག་ལཱུ་ཡི་པ་དང༌། མཚོ་སྐྱེས་རྡོ་རྗེའི་སྒྲུབ་ཐབས་དང༌། ལམ་འབྲས་ཞམ་ལུགས་དང༌། ཞི་བྱེད་ལུགས་གསུམ་ག་གསན། ཁྱད་པར་སྐམ་ལུགས་གཙོ་ཆེ། ཆོས་སྐྱོང་ཏྲག་སང་ལ་སོགས་པ་ཞུས། བླ་མ་ཟངས་རི་བའི་མཁྱེན་པ་ཐམས་ཅད་བུམ་པ་གང་བྱོའི་ཚུལ་དུ་གསན། བླ་མ་རླུང་ཕྱག་དུམ་ལ་ཕྱག་རྒྱ་ཆེན་པོ་རླུང་གི་ལུགས་གཞུང་རྩ་བའི་སྐོར། སྟོང་ཐུན་གདམས་ངག་གི་སྐོར། ཕག་མོ་བྱིན་རླབས་ཀྱི་སྐོར་དང་གསུམ་སྟེ། དེ་ལྟར་དོ་ཧ་སྐོར་གསུམ་དུ་གྲགས་པའི་ཆོས་སྐོར་མ་ལུས་པ་དང༌། གཏོར་རྒྱུད་ཆེན་པོ་གསན། མགོན་པོ་སྟག་ཞོན་གྱིས་སྣ་དྲངས་པའི་བསྟན་སྲུང་གི་སྐོར་བསམ་གྱིས་མི་ཁྱབ་པ་གསན། གྲུབ་ཐོབ་མལ་བྱེ་ཚང་པ་ལ་ཀ་ཀི་ནིའི་སྐོར་ཞུས། དེ་ལྟར་ངམས་ཤོད་སྨད་དུ་གསན་པ་མཛད་ཅིང་ལོ་བདུན་ལྷག་ཅིག་བཞུགས། ཉི་ཤུ་རྩ་བཞི་ལ་ཡར་བྱོན་ཏེ། སློབ་དཔོན་ཇོ་བསོད་བཅུ་དགུ་ལ་གཙང་ནས་མར་བྱོན་པ་དང་གུང་བསྟུན་ནས་སྐུ་མཆེད་གཉིས་ཆེ་འདོན་མཛད། གཤེགས་སུན་ཚར་བ་དང་ཁོང་གཙང་དུ་གཤེགས། ཇོ་ཡེས་ཀྱིས་ནང་སྟོན་ཇོ་འཁྱམས་ལ་ཕུར་པ་གསན་ཏེ། ཆུ་བོ་རིར་བཞུགས་ནས་སྒྲུབ་པ་མཛད། དེ་ནས་ཞིག་པོའི་དྲུང་དུ་བྱོན་པ་ཡིན་ཏེ། དང་པོ་ཆོས་ཞུ་བའི་རྟོག་པ་མེད། ཆོས་ཀྱང་ང་རང་མཁས། གདམས་ངག་ཀྱང་ང་རང་ཆེ། ཁོང་སྙན་པ་དང་གྲགས་པ་ཆེ་བར་འདུག་པ་དང༌། ནུ་བོའི་སློབ་དཔོན་ཡིན་པས་མཇལ་ཕྲད་ཀྱི་རྣམ་གཞག་ཅིག་ཀྱང་བྱ་སྙམ་ནས།