[A:184]ཞལ་བལྟ་ཞིང་རྣམ་གཞག་ལ་བྱོན་པས། ཞིག་པོ་བདུད་རྩི་འུག་སྐད་དགོན་པ་ན་བཞུགས་པ་དང་མཇལ། ཞལ་མཐོང་བ་དང་གུས་པ་རང་དབང་མེད་པ་སྐྱེས་ནས། ནང་པར་འགྲོ་ཙ་ནའང་ཞབས་དྲུང་དུ་འོང༌། གུས་པར་བྱུང་བས་ཐུགས་ཀྱིས་གཟུང་བར་ཞུ། ཞུས་པས། མོས་པར་བྱུང་ངམ་གསུང༌། ཤིན་ཏུ་མོས་པ་བྱུང་ཞུས་པས། འོ་ན་ལས་འཕྲོ་ཡོད་པ་ཡིན་པས་ད་ལྟ་རང་ནས་སྡོད། འཁོར་བའི་མཚན་ཉིད་མི་རྟག་པ་ཡིན་པས་ཕྱིས་ཀུན་ཇི་ལྟར་འོང་ཆ་མེད་གསུང༌། ད་རེས་སྡོད་རྩིས་མེད་པས་ཆ་རྐྱེན་ཅི་ཡང་ཁྱེར་མ་ཡོངས་ཞུས་པས། འདིར་འོང་བ་ལ་རྒྱགས་ཕྱེ་ཁུར་ནས་འོང་བ་སུ་ཡང་མེད། ཁྱོད་གཅིག་པུ་ལ་ཆ་རྐྱེན་ལོགས་པ་ག་ན་དགོས་གསུང་དེ་ནས་དེའི་ཚེ་རང་ནས་ཞབས་དྲུང་དུ་བཞུགས་ཏེ་ཆོས་གསན་པ་ལས། དེ་ཡང་རྒྱུད་ཀྱི་སྐོར་ལ། ཀུན་བྱེད་རྒྱལ་པོ་མ་བུ་སུམ་བསྐོར། བཤད་རྒྱུ་མདོ་བཅུ། འཁོར་བ་རྩད་གཅོད་ཀྱི་རྒྱུད་ལ་བཤད་རྒྱུད་སྡེ་བཞི། རྩ་བ་འགྲེལ་པ་རྒྱན་ཆོས་མན་ངག་དང་བཅས་པ་གསན། རྩ་བ་བཅོ་བརྒྱད་ཀྱི་བཤད་སྲོལ་ལ་ཟབ་པ་གཞུང༌། གབ་པ་མངོན་དུ་ཕྱུངས་ཏེ་མན་ངག་སྒོམ་སྡེབས་སུ་བཤད་པ། དེའི་སྒོམ་འགྲེལ་སྙིང་གི་ཉི་མ་དྲུག ཡང་སྙིང་རིག་པའི་ཉི་མ་དྲུག་སྙན་རྒྱུད་སྤྲོ་བ་ནག་པོའི་ཆོས་སྐོར་དང་བཅས་པ། སྒོམ་ཡིག་ཆེན་མོ། རིག་ཉེ། མིག་སྒྲོན། གདར་ཤ གཟེར་བུ་རྣམས་གསན། གདམས་པ་སྙན་བརྒྱུད་ཀྱི་སྐོར་ལ། སྐོར་ལུགས་རོང་ལུགས་ཁམས་ལུགས་གསུམ་གྱི་གདམས་ངག་ཕྱག་བཞེས་ཁྲིད་དང་བཅས་པ་རྣམས་ལ་ནན་ཏན་ཆེར་མཛད།