[A:185]ཞིག་པོའི་ཞབས་ལ་གཏུགས་ཤིང༌། གསུང་གི་ཆུ་རྒྱུན་དྲི་མ་མེད་པ་ལེགས་པར་འཐུངས་པས་ཐུགས་དགོངས་ལོངས། བྱིན་རླབས་ཞུགས། རྟོགས་གྲོལ་དུས་གཅིག་ཏུ་གྱུར་པ་ལགས། ཆོས་སྐུ་རང་ལ་གནས་ཀྱང་རང་ངོ་མ་ཤེས་པ། ཐོག་མ་མེད་ནས་འཁྲུལ་ལུགས་བསམ་མི་ཁྱབ། ལས་འཕྲོ་སད་དམ་བསགས་པའི་སྟོབས་ཀྱིས་སུ། མཚན་ལྡན་བླ་མ་གསང་སྔགས་ཟབ་མོ་དང་མང་དུ་མཇལ་ཏེ་ཐོས་པ་བག་རེ་བྱས། སེམས་ཀྱི་སྒྲོ་འདོགས་ཞིག་པོའི་དྲུང་དུ་ཆོད། མཉམ་མེད་རིན་ཆེན་དེ་ཡི་ཐུགས་ཀྱི་བཅུད། བརྒྱུད་པ་བཞི་ལྡན་གདམས་ངག་ཟབ་དགུ་གནང༌། ཞེས་ཀྱང་གསུང༌། དེ་ལ་སྤྱིར་སྐྱེས་བུ་འདི་ནི་ཐོག་མ་ནས་སྔོན་སྦྱངས་ཀྱི་བསགས་པ་དང་ལྡན་པས་རིགས་རྒྱུད་དང་ཤེས་རབ་གཞན་ལས་ཁྱད་པར་དུ་འཕགས་པ། སྐུ་གཞོན་ནུ་ནས་བླ་མ་མཁས་གྲུབ་མང་པོའི་ཞབས་དྲུང་དུ་གཏུགས་པས་མཁྱེན་པའི་ནོར་བུ་ཕུན་སུམ་ཚོགས་པ་དང་ལྡན་པ། རྒྱུད་གདམས་ངག་མཐའ་དག་གི་དོན་ཐུགས་སུ་བྱོན་ཤིང་རྗེ་གོང་མ་རྣམས་ཀྱི་བྱིན་རླབས་ཞུགས་པས་སྣང་བ་ཆོས་ཉིད་ཀྱི་དཀྱིལ་འཁོར་དུ་རྟོགས་པ། འཇིག་རྟེན་གྱི་སྒྲོ་བཀུར་ལ་ཉམ་མི་ང་བས་ཚུལ་འཆོས་མེད་པའི་སྤྱོད་པ་མཛད་པ། དུས་ཐམས་ཅད་དུ་བླ་མའི་གུས་པ་དང་མ་བྲལ་བས་བླ་མའི་འཕྲིན་ལས་སྒྲུབ་པ་དང༌། གདན་སའི་ཞབས་ཏོག་མཛད་པ་ལ་སྐྱོ་ངལ་མེད་པ། ཐུགས་བརྩེ་བ་ཆེན་པོའི་སེམས་བསྐྱེད་དང་ལྡན་པས་རང་གཅིག་པུའི་ཞི་བདེའི་བློ་མ་སྐྱེ་བར་ཞི་དྲག་གི་ཕྲིན་ལས་ཀྱིས་གང་ལ་གང་འདུལ་དུ་སེམས་ཅན་གྱི་དོན་མཛད་པ། མཛད་པ་